Qullissat
Qallunaat Qullissat pillugu ilisimasaqannginnerat atuakkiortumit iliuuseqarfigineqarusuppoq
Søren Peder Sørensen qallunaat illoqarfiiini quligiluani Qullissat matuneqarsimanera pillugu oqalugiaateqassaaq
Alianaqisumik Qullissat matuneqarsimaneranik oqaluttuaq Nunatsinni meeqqanit amerlanerpaanit ilisimaneqaraluartoq, illoqarfik oqaluttuassartaalu qallunaanit ilisimaneqanngilaq.
- Qullissat eqqartorneqartillugu, Danmarkimiit Kalaallit Nunaanniillu assigiinngeqisunik ilisimasaqartut nalaattarpara, atuakkiortoq aamma tusagassiortoq Søren Peder Sørensen Sermitsiaq.AG'mut oqarpoq.
Atuagaq ‘Qullissat - Byen der ikke vil dø’ 2013-imi saqqummersippaa. Massakkullu illoqarfiup matuneraniit inuillu 1.100 sinnerlugit pinngitsaalillugit nuutsinneqarneraniit ukiut 45-t qaangiutereeraluartut oqaluttuaq oqaluttuariinnarnissaanut pissutissaqarluartoq, Søren Peder Sørensen isumaqarpoq.
- Illoqarfik Qullissat najugaqarfiusimanera Danmarkimi ilisimaneqarnera annikitsuaraavoq, taanna oqarpoq.
- Ukiullu 45-t qaangiunnerini Qullissaninngaanneersut pinngitsaalisaallutik nuutsitaanermi kingorna kingunerlutitsisimasut suli naapitassaapput. Ilaat ingerlalluarput, ilaannulli inuunerissaarfiuvallaarnani.
Oqaluttuarlu taanna qallunaat illoqarfianni qulingiluani, arfininngorpat Nordyllandimi Løndstrupimi aallartittumik oqaluttuarissavaa.
Søren Peder Sørensen illoqarfik aamarutissarsiorfiup pinngitsaalillugu matuneqarsimanera pillugu oqalugiartareersimavoq. Qisuariaat assigiinngitsorujussuuvoq inuit oqaluttuamik ilisimasaqareerneraat apeqqutaalluni.
- Ilisimasaqanngitsunit tupigusunneq narrujuummernerpassuillu nalaattarpakka, taanna oqarpoq.
- Inunnillu Qullissaniissimasunik takkuttoqartarpoq, immaqa angajoqqaatik tassaniinnikuummata.
Taamatut tulleriissaaraluni oqalugiarnissaq Foreningen Norden'imit najukkamilu kulturikkut illorsuarnit atuakkanillu atorniartarfinnit aaqqissuunneqarpoq.
Oqalugiartarnernerminilu siuliini kalaallit qallunaallu peqataatillugit iluaqutaanerusartoq Søren Peder Sørensen'ip maluginiarsimavaa.
- Pissanganartumik naapeqatigiisitsisarpoq nuannersunillu oqaloqatigiisitsisarluni, taanna oqarpoq.
Lønstrup'ip saniatigut Ballerup, Nyborg, Aabenraa, Hillerød, Hammel, Silkeborg, Asnæs aamma Sorø Søren Peder Sørensen'imit tikeraarneqassapput.
Atuagaq 'Qullissat - byen der ikke vil dø' aappassaanik naqiterneqarluni saqqummeqqammerpoq.