Danmark
Qallunaat ilinniartitaanermut ilisimatusarnermullu ministeriata Eskimologi attatiinnarusuppaa
Københavnip Universitetiani Eskimologimik ilinniarfiup matuneqarnissaanik isumaliuuteqartoqarnera, qallunaat ilinniartitaanermut ilisimatusarnermullu ministeriata Esben Lund Larsenip maanna isornartorsiorpaa
Københavnip Universitetiata ilinniakkat ikitsunik ilinniarfigineqartartut matuneqarnissaanik pilersaaruteqarnera, tassani Eskimologi ilanngullugu, Ilinniartitaanermut ilisimatusarnermullu ministeri Esben Lund Larsenip (V), aviisimi Jyllands-Postenimi allaatiginninnermi isornartorsiorpaa. KNR taama ilisimatitsivoq.
Ministerip saniatigut Danmarkimi naalakkersuisuutitaqartut ilinniartitaanermut oqaaseqartartui allaatiginneqataapput.
Atuaruk: Universitetip fagi Eskimologi unitsippaa
- Ilinniakkat taakku amerlanngitsunit ilinniarfigineqartartut inuiaqatigiinnik aamma kulturinik allanik uagutsinnillu paasinninnissatsinnut pingaaruteqarput. Taamaattumik fagit amerlanngitsunik ilinniarfigineqartartut piutinnissaat pingaartuuvoq, politikerit allaatigisaminni taama allapput.
Aningaasanut inatsit
Taamatut oqariartuuteqarnerup politikerit namminneq aningaasanut inatsimmi sapaarniuteqarnissamik piumasaqarnerisa killormoortoraa, piumasaqaataasami naalaaffeqatigiiffimmi ilisimatusarfiit annersaata ukiaanerani 2016-imi ilinniartunik aallartitsisarunnaarneranik kinguneraat.
Atuaruk: Aaja: Eskimologi pingaarnerutinneqannginnera kukkulluinnarpoq
Kisianni politikerit isumaqarput, taakku ilinniakkat matusariaqanngitsut - tassami ilinniakkanut taakkununngarpiaq atugassanik aningaasanik tapiisoqartarmat. Taamaammat Københavnip Universitetiata Eskimologi matunagu allannguiffigigunikkit pitsaanerussaaq.
Assit takukkit: Eskimologi atatinnissaanut iliuuseqartut