Assammik arsarluni VM
Qallunaat assammik arsarluni VM-ernermit anipput
Spaniamiut Canellasertaat sekundi kingulleq atorlugu qallunaanut ajugaassutigisaminnik isertitsivoq
Annonse
Sekundi ataaseq atorlugu qallunaat VM-imi peqataanerat pingasunngornermi oqaluttuaannanngortinneqarpoq.
Qallunaammi pissanganaqisumik kvartfinalimi Spaniamut unammereerlutik 25-24-imik ajorsarput, unikkallarnerminni 11-11-imik naligiikkaluarsinnarlutik.
Spaniamiut nunarsuarmi tusaamasartaat Joan Canellas arsarnermut taamaatinnissaa sekundialunnik sioqqullugu ajugaassutaasumik isertitsivoq.
Qallunaat maanna inissititernernut kingullernut unammeqataasussanngorput, tassa assammik arsarluni VM-ertoqarnerani 5-nngorniuttuniit 8-nngorniuttunut.
Inissinniunnerit OL-imut pingaaruteqarput. Danmarkip Slovenia tallimanngorpat unammissavaat.