aningaasaliineq
Qallunaat aningaasaateqarfii: Kalaallit Nunaat nuna siuarsagassatut ippoq
Danmarkimi soraarnerussutisiaqalernissamut aningaasaateqarfiit milliardiliutaat Kalaallit Nunaanni nunap ataani pisuussutinut aningaasaliissutigineqassappata pisariaqarput politikkikkut ingerlatsineq aalajaatsoq qallunaallu naalagaaffiata peqataanissaa.
2013-imiilli pimoorullugu oqaluuserineqartarsimavoq qallunaat soraarnerussutisiaqalernissamut aningaasaateqarfissuisa aningaasaataat milliardillit Kalaallit Nunaanni nunap ataani pisuussutit iluanaarniutiginerannut aalajangiisuusumik inissisimasinnaanersut. Oqalunnerinnaasimavorli. Aatsitassaqarnikkut nutaarsiassat ajortut takkuttaqattaaleruttorneranni, tamannalu peqatigalugu Nuummi politikkikkut nalorninartoqarnera, Københavnimilu politikkikkut akulerunnissamut ersissuteqarneq pissutigalugit tamaangaannaq killittoqarnissaa ilisimanarsigaluttuinnarpoq.
Pensionsdanmar-imi, qallunaat soraarnerussutisiaqalernissamut aningaasaateqarfissuisa anginerpaat ilaanni, pisortaaneq Torben Möger Pedersen oqarpoq Kalaallit Nunaanni aningaasaliissuteqassagaanni pisariaqartoq ilaatigut politikkikut ingerlatsineq aalajaatsoq, ilaatigullu piffissamut sivisuumut aatsitassanut periusiortoqarnissaa, tamannalu Kalaallit Nunaanni naalakkersuisuusartut kingulliit piviusunngortikkuminaattarsimagaat. Ilaatigullu pisortat namminersortullu suleqatigiissuteqartariaqartut, silap pissusianut aningaasaliinermut aningaasaateqarfittut taaneqartartutut ittumik, nunanut piitsunut siuarsagassanut aningaasaliissuteqartartumik.
– Aningaasaateqarfiup taamaattup pilersinneqarnissaata tungaanut Kalaallit Nunaanni aningaasaliissuteqarnissavut sallersaatinneqassanngillat. Soraarnerussutisiassatut ileqqaakkat Kalaallit Nuaani aningaasaliissutigissagutsigit suli ajornartorsiuteqaaluppoq ulorianartoqaalullunilu qaangerneqaqqaartariaqartunik, aningaasaliissuteqarnissaq ilimanaateqarluarsinnaagaluartoq, Torben Möger Pedersen oqarpoq. Taanna sapaatip akunnerani tullermi ataatsimeersuarnermi, Future Greenland-imi, GE-mit aaqqissuunneqartumi, saqqummiussissaaq, tamatumani tikkuarniarlugit periarfissat - tutsuviginarporlu, minnerunngitsumik soraarnerussutisiaqalernissamut aningaasaateqarfiit Kalaallit Nunaanni aningaadaliissuteqarnissaminnut unammilligassatut isigisaat.