Oscarinik nersornaasiinerit

Qallunaap Oscarimik nersornaaserneqarnini nuannaarutigaa

Filmiliortartup Anders Walterip filmiliaaqqani 'Helium' Oscarinnassutigaa

Oscarinik nersornaasiinerni ingerlatsisoq Jason Sudeikis filmiliaaqqamik 'Helium'-imik suliaqartoq Anders Walter kiisalu Kim Magnusson

Qallunaamik Oscarinnattoqaqqippoq. Oscarimik nersornaasiinerit sapaatip unnukkuani Los Angelesimi ingerlanneqarput, tassani filmiliaara 'Helium' qallunaamit Anders Walterimit suliarineqartoq Oscarinnammat.

- Misigisaq tupinnaqaaq, Oscarimik nersornaaserneqarnera suli paasisinnaanngilara.

- Tusagassiortunik katersortitsinernut amerlasuunut ilaatinneqarpunga assiliseqattaaqalungalu, Anders Walter Ritzau-imit apersorneqarluni oqarpoq.

- Misigisaq pilluaammernaqaaq, oqarpoq.

Oqalugiarnermini nuliani Anne Klitten Andersen paninilu Clara qujassuteqarfigai.

- Oqalugiaatissara piareersarpara, Anders Walter oqarpoq, Oscarimillu nersorinnittartut filmiliaaqqat suli Oscarinnatsinneqartarnerat qujassuteqarfigalugit.

Nukappiaraq Alfred filmimi 'Helium'-imi pineqarpoq, katsorsarneqarsinnaanngitsumik nappaateqarpoq, angummillu asaasartumik immikkuullarissumik kammaqalerluni. Takorluukkamik marluullutik pilersitsipput, nukappiaqqallu sinnattumini takorluukkamiittarluni.

Anders Walter aatsaat Oscarinnappoq, pinnattaanilu tupinnartoqartippaa.

- Ilimagisanniit Oscari oqimaanneruvoq, ataatsimillu aamma aallamik eqqumiigisaqarpoq.

- Paarillugu ataqqinartupilussuuvoq, paaralugu tupissaqaaq, oqarpoq.

Anders Walteri Hollywoodimiinnermini suli festertunut akuusimanngitsoq festissamaarluni oqarpoq.

- Maannakkumut suli imerusunngikkaluarpunga, aqagoqarnissaanulli ernumassuteqanngilara, Oscarinnannerami nuannaarutigissavarput, Oscarinnattoq oqarpoq.

Oscarinik nersorinninneqareersoq Anders Walterip ilaatigut Brad Pitt Angelina Joliesilu neriartarfimmi naammattoorpai.

- Oscariutiga paarillugu Brad Pittiliarpunga oqarfigalugulu unnuk nuannertorujussuusoq, oqarfigaarali unnuk nuannerneruliinnassasoq assammillunga ilassigaluarpanga.

- Taanna misigalugu nuanneqaaq, assammissimanngitsuuppangami immaqa periarfissaqaqqissimassanngikkaluarpunga, Anders Walter oqarpoq.

Powered by Labrador CMS