Qalipakkat igalaaminermillu eqqumiitsuliat Katuami saqqummersinneqartut
Kalaallit Nunaanni eqqumiitsuliortut ingerlalluartut ilaat, Buuti Pedersen, Nuummi Katuami saqqummersitsivoq
Buuti eqqumiitsuliortuunermini Kalaallit Nunaanni pingaaruteqartuuvoq, ukiullu 30-t sinnerlugit suliaasa nunarput tamaat angusimavaat. Suliarpassui pinnersagarpassuilu sumiluunniit takussaapput piumassuseqarneralu takuneqarsinnaavoq misigissutsinik attuisarnerani.
Buuti maanna Katuami saqqummiilerpoq, saqqummersitsinini atserlugu ’Isigisat Sunneqatigiinneri’, kultoorip illorsua, Katuaq tusagassiutinut taama nalunaaruteqarpoq.
- Saqqummersitat ilagaat qalipakkat tallimat angisuut nunamik takutitsisut, igalaaminermik eqqumiitsuliat aammalu imilertakkanik qalipakkat mikisut silaannarsuaq Kalaallit Nunaata Danmarkillu akornaniittoq isumassarsiorfigalugu qalipataasut, tusagassiutinut nalunaarummi allassimavoq.
Buuti 2014-imi Qaqortumi aallaaveqarpoq, aalajangersimavorli Danmarkimi Sjællandip kujasissortaani ilaquttanilu piffissap ilaani najugaqartassalluni.
- Buutip Kalaallit Nunaanni pinngortitaq isumassarsiorfigisarpaa, nuunnermili kingorna aamma Danmarkip kusanassusia isumassarsiorfigisalerpaa eqqumiitsulianillu arlalinnik pilersitsinermini avatangiisini nutaat aallavigaluit suliarisimasani takutissavai. Isisginnaartussat malugisinnaassavaat Kalaallit Nunaata pinngortitaa isumassarsiorfigalugu suliat alutornartumik allanngortut, tassami Danmarkip pinngortitaa avatangiisillu Buutip isumassarsiorfigalugit suliarisalermagit, Katuaq nalunaaruteqarpoq.
Saqqummersitsineq Katuami pissaaq novemberip arfineq-pingajuaniit decembarip arfernata tungaanut, aammaanersiornerlu pissalluni Katuap paarlersuani sisamanngornermi novemberip arfineq-pingajuani nalunaaqutaq ualikkut sisamanut.