avammut tuniniaanermi akitsuut
Qalerallit suliarineqanngitsut akitsuuteqalissapput
Qalerallit suliarineqaratik nunanut allanut tunineqartartut akitsuuteqalersinneqarnissaannik inatsisissatut siunnersuummik Naalakkersuisut ukiakkut ataatsimiinnermi saqqummiussissapput
inatsisartut 2013-imi ukiakkut ataatsimiinneranni aalajangiunneqarpoq qalerallit suliarineqaratik avammut tuniniarneqartartut akitsuuteqalersinneqassasut. Maanna Jens Immanuelsenip, Siumut, paragraf 37 naapertorlugu apeqqutigaa tamanna Naalakkersuisut qaqugu piviusunngortinniarneraat.
Aningaasaqarnermut akileraarutinullu Naalakkersuisoq Vittus Qujaukitsoq akivoq inatsisissatut siunnersuut juulip 17-iata tungaanut tusarniaavigianeqartoq.
Naalakkersuisup naatsorsuutigaa inatsisissatut siunnersuut ukiakkut ataatsimiinnermi saqqummiussinnaassallugu, naatsorsuutigineqarporlu 2015-imi januaarip aallaqqaataanit atuutilerumaartoq. Tusarniaanermut atortuni allassimanngilaq akitsuut inuiaqatigiinnut qanoq aningaasatigut kinguneqassanersoq.
Inatsisissatut siunnersuummut oqaaseqaatini allassimavoq japan cut-it suliarineqarsimasutut isigineqassasut taamaattumillu qalerallit tamakku akitsuuserneqassanngitsut. Suliarineqarsimappatali taamaallaat avalerai peerlugit aalisagaq akitsuuteqassaaq.
Aalisartut akornanni tikkuarneqarpoq qalerallit suliarineqaratik avammut tuniniarneqartut qaleralinnit suliarineqartunit isertitsissutaanerusartut.