akitsuutit

Qalerallit pillugit akitsuusiiniarneq isornartorsiorneqarpoq

Naalakkersuisut akitsuusiinissamik siunnersuutaat aalisartut piniartullu kattuffiannit kiisalu illuatungiliuttunit IA-mit isornartorsiorneqarpoq

KNAPK-mi siulittaasoq Henrik Sandgreen

Aningaasanut inatsimmut aappaagumoortumut isumaqatiginninniarnerni Naalakkersuisunit arlalinnit isornartorsiorneqareerput.

Qaleralinnut akitsuusiiniarneq KNAPK-mit aamma Inuit Ataqatigiinnit isornartorsiorneqarpoq.

Piviusorsiunngitsoq
Qalerallit suliareqqinneqanngitsut avammut annissugassat akitsuuserneqartalernissaat KNAPK-mi siulittaasumit Henrik Sandgreenimit isornartorsiorneqarpoq.

- Politikkikkut aamma sinerissami qanittumi aalisarnerup qineqqusaarutigineqarneranut naapertuutinngilluinnarpoq. Uggornarporlu taamatut massakkut naalakkersuinikkut aamma ingerlatsisoqalernera, Henrik Sandgreen KNR-imut oqarpoq.

Siunnersuummimi, qalerallit aggorneqanngitsut avammut tunineqarnissaanni akitsuusersuinissaq piviusorsiorsorineqanngitsoq oqarpoq.

- Uanga piviusorsiortutut oqaatigisinnaanngilara, tassami uani ilimagisariaqarparput taamatut iliorneq aamma illuatungaani kingunerlussinnaammat, KNAPK-p siulittaasua oqarpoq.

IA: Pissakinnerusut eqqorneqassapput
Inatsisartuni ilaasortaq, aalisarnermut naalakkersuisuusimasoq, IA-mit Ane Hansen siunnersuut aamma isornartorsiorpaa.

- Arlalitsigut siunnersuut ernumanartoqartippara. Ilaatigut aalisarnermut akitsuusersuinissaq pillugu aaliangernermi eqqugaasussat peqataatinneqarsimanngilluinnarnerattut isikkoqarnera, kiisalu Naalakkersuisut qaammatit sisamat matuma siorna oqaaseqaatigisaminnik killormoortuanik iliuuseqarnerat, tassami qaammatit sisamat matuma siorna paasissutissiissutigineqarmat qaleralinnik aalisarneq 2016-imi akitsuusersorneqassanngitsoq, Ane Hansen tusagassiuutinut nalunaarummi oqarpoq.

- Eqqugaasussat tassaapput pissaqarluartutut inissisimanngitsut, arlalitsigullu unammilligassaqareersut. Taakkuuppummi aalisartut mikisunillu suliffeqarfiutillit eqqorneqartussat amigartoorutinik matussusiisussat, Ane Hansen oqarpoq.

Naalakkersuisut isumaqatigiinngitsut
Inuit Ataqatigiinnit qularineqanngilaq taassuma kingunerisaanik equngasumik ineriartortoqalernissaa.

- Uissuumminarportaaq Naalakkersuisut namminneq politikkerisami killormoortuanik aaliangiisarnerat, qaammatialuillu iluanni oqaaseqaatigisimasatik killormoortuanik iliuuseqarniarnerat. Ernumanartilluinnarpara, taamaattumillu Naalakkersuisut peqqorusuppakka iluarsartuutissat pillugit ataatsimiinnissamut attorneqartussat partiillu qaaqquneqassasut, siunnerfigineqarniartoq iluarsiiffigeqqullugu, IA-mi politikkeri oqarpoq.

Powered by Labrador CMS