MSC-mik allagartaliineq
Qalerallit MSC-mik allagartaliinerit
Qaleralinniarnermi aatsaavissuaq MSC-nik allagartalersuisoqalerpoq
Kitaani qaleralinniarluni kilisattarneq suliarineqareerluni MSC-mik allagartalersorneqalerput, suliaq marsip qaammataani 2016-mi aallartippoq.
Tamanna ullumi pingasunngornermi pivoq, Sustainable Fisheries Greenlandilu suliniuteqartuuvoq, taakku nunatsinni aalisakkerinermik- tunisassiorfinnillu suliffeqarfinniik kattussuussaapput.
- Tamanna nunarsuarmi niueqatigiittarfinni tunisassiat piuaannartitsinermik aallaaveqartuminngaanneernerisa uppernarsaatissartaqalernerat Kalaallit Nunaanni qaleralinnik tunisassiortunut nalitoorujussuuvoq. Taamaasilluni kalaallit tunisassiaat niueqatigiittarfinni nalitunerpaani tuniniarneqarsinnaalernerat qulakkeerneqarpoq, Sustainable Fisheries Greenland tusagassiuutinut nalunaarummini allappoq.
Nunatsinni kilisalluni qaleralinniartarnerup saniatigut, raajat nipisaallu taamatuttaaq MSC-mik allagartalersugaapput, tamannali 2013-mi 2015-milu pivoq. Kiisalu saarulliit, kullerit saarulliusaallu Barentshavemi pisarineqartartut 2015-mi MSC-nik allagartalersorneqalerput.
Ullumikkut nunarsuaq tamaat isigalugu aalisakkat 312-it MSC-nik meqqulersungaapput.