Royal Greenland

Qalerallit MSC-mit akuerisat Maniitsumi tunisassiarineqartalissapput

Saarulliit suli uumasut mamartuliarilluinnarlugit tassa Nutaaq Codiliaralugit Royal Greenlandip Maniitsumi tunisassiorfiani sapaatip-akunnera 48 ilanngullugu tunisassiarineqarput.

Qalerallit MSC-mit akuerisat Royal Greenlandip Maniitsumi tunisassiorfiani ullumikkut marlunngornermi tunisassiarineqartalerput. Qaleralinnik tunisassiat MSC-ip ilisarnaaqqutaannik ilisarnaaserneqartalertussanngormata tunisassiorfimmi sulisut qaleralinnik MSC-mit akuerisanik tunisassiortalernissamut piareersarlutik sapaatip-akunnera kingullermi ulappupput.

Suliffeqarfik nittartakkamini taama allaaserinnippoq.

- Royal Greenlandip kilisaataatai marluk; Sisimiut aamma Tuugaalik avataani qaleralittanik katillugit 1000 tonsiusussanik tunisassiorfimmut pilersuisuussapput. Qaleralittat 1000 tonsiusussat sulisut 120-t 2018-imi marsip tungaanut suliassaqartinneqarnissaannut qulakkeerisuussapput, tamatuma kingorna saarullinnik suli uumasunik tunisassiorneq aallarteqqissavarput, Maniitsumi tunitsiviup pisortaa, Susanne Marie Knudsen oqarpoq.

Qaleralinnik tunisassiornerput aatsaat januaari 2018-imi aallartissasoq pilersaarutaagaluarpoq, tunisassiorfimmi ingerlatsisoq nassuiaavoq.

- Saarulliit suli uumasut tunineqartartut decembarip aallartinneraniilli annikilliartuinnarmata aamma sulisut juullernissaanut aningaasarsiornissaat qulakkeerumallugu aalajangerpugut qaleralinnik tunisassiorneq sapaatip-akunnera 50-imi aallartissagipput, Susanne Marie Knudsen oqarpoq.

Aalisartut Maniitsumeersut saarullinnik tunisassiorfimmi nalinginnaasumik tunisassiarineqartussanik tunisinissaminnut periarfissaqartinneqarnerat atuutiinnassaaq.

Powered by Labrador CMS