Qalerallit immikkut akitsuuserneqarnissaat illersorpaa

Imaalluarsinnaavoq akitsuutivut nutaat pitsaasuinnarmik sunniuteqarnavianngitsut.

Ataatsimulli isigalugu isumaqarpugut silatusaarnerusoq.

Qalerallit nutaamik akitsuuserneqarnissaat pilllugu oqallinnermi Anda Uldum (D) maanna oqarpoq.

– Mattussinnaanngilarput ingerlatsiviit akitsuut sinerissamut qanittumi aalisartunut tutsinniassagaat tunisinermi akit appartinnerisigut, Uldum tusagassiorfinnut nalunaarutikkut allappoq.

Qalerallit akitsuuseqqillugit

Tamanna peqatigalugu eqqaasitsissutigaa qalerallit tunineranni akiat 2010-miilli marloriaat sinnerlugu qaffassimasoq, aammalu aningaasanut inatsimmik isumaqatigiissuteqartut (Siumut, Demokraatit Atassutillu) naatsorsuutigigaat tunisinermi akit appassagaluarpataluunniit sinerissamut qanittumi qaleralinniartartut siunissami suli aningaasarsiorluassasut, Anda Uldum allappoq.

Aalisaertut akitsuummut akileerusunngikkunik qanittukkut allanik pitsaasunik sammisassarsiussapput.

2012-imi taamanikkkut Naalakkersuisut avataasiorluni qaleralinniarnermut akitsuummik eqqussipput. Ukiut marluk qaangiuttut akitsuut tuniniaanermi akinik tunngavilerneqarpoq.

Akitsuutikkut 20 millioninik isertitsinissaq neriuutigaat

Aalisartuni mikisuni angisuunilu qalerallit akitsuuseqqinneqarnerat nuannarineqarpallaanngilaq, KNAPK-p siulittaasua Henrik Sandgreen sapaatip akunnerani siusinnerusukkut oqarpoq.

Siumulli, Demokraatillu Atassutillu neriuutigaat qaleralinnut akitsuutikkut nutaakkut landskarsi imassaaleqisoq 20 millioner koruuninik isertitsissasoq.

– Aalisarnermi akitsuuteqartitsineq amerlanernit akuerisaavoq, tassa aalisakkanut inuiaqatigiit aalisartunut atugassarititaannut, tamanna aalajangersimasunik aalisarnermi aningaasanik isertitsissutaalluarpat, naalakkersuisoqatigiit oqarput.

Suliffiit amerlanerusut

Qaleralinnut akitsuutikkut nutaakkut aningaasat amigaatigineqartut ilaat isertinneqassapput, partiit pingasut isumaqatigiissutigereeraallu akitsuutinik qaffaanissat nuannarineqanngitsut arlallit taamaatiinnarniarlugit.

Anda Uldumip neriuutigaa akitsuut nutaaq landskarsimut imassaaleqisumut kisimi iluaqutaassanngitsoq. Taanna allappoq naatsorsuutigalugu akitsuut millionilinnik isertitsissutaasussaq aalisakkanik suliffissuarni suilffissanik amerlanerusunik pilersitsissasoq.

– Siunertaavoq annissinermut akitsuut nunatsinni suliffinnik amerlanerusunik pilersitsissasoq, taamaasillunilu akileraarutinik A-nik isertitsissutaalluni, tassa avammut tuniniaasartunut qalerallit nunami maani tunisassiarinissaat pilerinarnerulerpat.

Nalorninartulik

Siunnersuutikkut ingerlatsiviit inuillu qaleralinnut akitsuummut akiliisassapput, suliarinagit suliarereerlugilluunniit avammut tuniniarneqartunut, niaquerlugit paperuerlugilluunniit.

Anda Uldumilli nalunaarunni nalorninartoqartoq isertuutinngilaa.

Taassuma nassuerutigaa nalorninartoqarpoq akitsuutissaq ilumut sunniuteqassanersoq.

– Naalakkersuisut naliliipput qalerallit tunisassiarineqartassasut annertunerusumik suliaralugit, imaluunniit taamaasiinnarlugit avammut tuniniarneqartassasut, akitsuuserneqarlutilli. Taamaassappat suliassaqartitsinermut sunniutaa taamaaginnassaaq, iluanaaruteqartoqassaarlu, Uldum allappoq.