Aalisagartassiissutit
Qaleralittassiissutigineqartut WWF-p isornartorsiorpai
Naalakkersuisut Pinngortitaleriffiup innersuussutai tusaanngitsuusaarlugit 47 procentimik sinnerlugit qaleralittassiisimanerat Nunarsuarmi suliniaqatigiiffissuup WWF-p pakatsissutigaa
Upernavimmi, Uummannami Qeqertarsuullu Tunuani ingerlatsiveqarfinni aalisagartassiissutigineqarsimasut, uumassusilerituup Kaare Winther Hansenip ernumanartoqartippai.
Pitsaasumik ineriartorneq
- Kalaallit Nunaanni aalisarneq arlalitsigut ineriartorpoq. Uumasut assigiinngitsut pingasut massakkut MSC-mik akuerineqarnikuupput, raajanillu piujuaannartitsinermik ingerlataqarsimanerup kinguneranik raajartassiissutit 2015-imi 60.000-iusimallutik 2018-imut 105.000 tonsinut qaffaavigineqarput. Sinerissallu qanittuani qaleralinniarnerit saarullinniarnerillu pineqartillugit, Naalakkersuisut ajorluartumik piujuaannartitsineq tunngaviginagu ingerlatsipput, aammalu ilaatigut Pinngortitaleriffiup, KNAPK-p, aalisarnermik ingerlatsinermi sinniissut WWF-llu ernumallutik kajumissaarutaat tusaanngitsuusaarsimavaat, Kaare Winther Hansen, tusagassiuutinut nalunaarummi oqarpoq.
Qeqertarsuup Tunuani qalerallit amerlanerpaamik 6.400 tonsit aalisarneqarnissaat, uumassusilerituut innersuussutigaat, aalisagartassiissutillu ajoraluartumik 9.200-nik amerlassusilerneqarsimapput. Qeqertarsuullu Tunuani sinerissap qanittuani qaleralittat ikileriaateqangaatsiarfiisa nalaani taamaaliortoqarpoq.
Aamma atuaruk: Qaleralittassiissutit Naalakkersuisut akuersissutigaat
Ukioq manna novembarip qaammataa tikillugu ukiup siulianut sanilliunnerani qalittat 4.000 tonsit missaanni ikinnerusimapput. Tassa Qeqertarsuup Tunuani aalisartut 78 million koruunit missaanni isertitakinnerulersimapput, taamatullu aningaasaqarnikku kinguariaateqarneq najugaqartunut sunniuteqarsimavoq, WWF-imi uumassusileritooq paasissutissiivoq.
Aalisarneq unammillerneqangaatsiartoq
- Qeqertarsuullu Tunuani qalerallit, ukiumi ataatsimi aalisarnermik unammillerneqangaatsiarnissaanut periarfissiinikkut, ernumanartorsiortinneqassapput. Aalisakkat tamakkerlutik piujuaannartitsinermik tunngaveqartumik ingerlanneqalernissaat politikerit massakkut anguniarlugu sulissutigisariaqalerpaat. Pisuussutit paarilluarneqarnissaat aalisartut siunissami isertitariumaagannut iluaqutaassaaq, taamaasiornermilu kinguaariinni tullerni aalisartunngorumaartussat aamma iluaquserneqassapput. Uumassusilerituut kukkusimappata, naatsorsuutigisamiillu Qeqertarsuup Tunuani qalerallit amerlaneruppata pisassiissutigineqarsimasut amerlineqaqqissinnaapput, aalisakkammi amerlanerulersimallutillu anginerulersimassapput, Kaare Winther Hansen erseqqissaavoq.