Aalisarneq
Qaleralinniarnermut maleruaqqusat nutaat
Namminersorlutik Oqartussat sinnerissap qanittuani qaleralinniartarnermut nalunaraataat sukateriffiginiarneqalerput.
Aalisarnermut Piniarnermut Naalakkersuisoq, Karl-Kristian Kruse tusagassiuutinut nalunarummi taama paasissutissiivoq.
Killilersuinerit
Ullumikkut Uummannap sulluani qalerallit tunineqartartut killilersorneqarput: Assersuutigalugu sumiiffiit ilaanni aalisartup qalerallit sapaatip akunneranut taamaallaat 800 kiilut tunisinnaasarpaat, Uummannamilu tunisiniartut ilaanneeriarlutik ullut marluk utaqqeqqaartarlutik.
Aqutsiveqarfik Uummannami umiatsiaararsorluni aalisarnissamut akuersissutillit 292-iupput, aalisariutaatillit 32-ullutik.
Ilulissat saavanni aalisarneq sukateriffigineqassaaq, taassuma malitsigisaanik aqutsiveqarfiit allat ilanngullugit sukateriffigineqassapput.
Pisoq ajornerusoq
- Aalisariutit aqutsiveqarfinnit allaneersut aqutsiveqarfik Uummannamut aalisariartartuusimanngikkaluarpata, taava pasitsannarsinnaavoq, qalerallit amerlannginnerit tunineqartarnissaat, Karl-Kristian Kruse taama oqarpoq.
- Naalakkersuisut kissaatigivaat aalisarsinnaanermut akuersissutaatillit aqutsiveqarfinnut Upernavimmut, Uummannamut aamma Qeqertarsuup Tunuanut pisassiissutigineqartut 10 procentiinit siunissami aalisarsinnaassasut, aalisartut aqutsiveqarfiit iluini nikissimallutik aalisariartillugit. Taamaalilluni aqutsiveqarfinni ataasiakkaani aalisakkat aalisarneqartut illersorneqarnerulersinnaassapput, Karl-Krisitian Kruse erseqqissaavoq.
Naalakkersuisut aamma kissaatigaat aalisarsinnaanermut akuersissutillit pisassiissutinik pigisaqartut killeqarfinni pisassiiffigineqarsimanngitsuni aalisarpata pisaat pisassiissutinik pigisanit ilanngaassutaasassasut. Taama pisoqartassaaq pisassiissutit pigisat tamaasa aalisarsimanngippagit, aqutsiveqarfimmi killeqarfimmi pisassiiffigineqarsimanngitsumi aalisarpat.
Killeqarfiit pisassiiviunngitsut
- Tamatuma ersersippaa Naalakkersuisut kissaatigigaat killeqarfiit pisassiiviunngitsut iluini aalisarsinnaanermut periarfissarititaasoq attatiinnarneqassasoq, sinerissap qanittuani qaleralinniarneq pillugu nalunaarummi allassimasoq naapertorlugu, Aalisarnermut Piniarnermullu Naalakkersuisoq oqarpoq.
Avannarpasissutsip 68`52 N-ip kujataaniittut, avannarpasissuseq killigalugu, avannarteqqittassanngillat, tamaani najugaqartut sukaterinermi salliusassammata.