unammillerneq

Qaleralinniarnermi unammillertoqalerpoq

Upernaviup eqqaani umiarsuarmik tunitsiviliinissamut naalakkersuisut akuersissuteqarput

Upernavimmi aalisartut periarfissaqalissapput suliffeqarfimmut sorlermut tuniserusunnerlutik

Upernaviup eqqaani aalisartut nammineq aalajangersinnaalissavaat suliffeqarfimmut sorlermut qaleralinnik tuniserusunnerlutik. Tamanna pivoq Naalakkersuisut akuersissuteqareersut Upernaviup eqqaani umiarsuarmik tunitsiviliinissamik.

Nunami suliffiit illersorniarlugit umiarsuarnik tunitsiviliisarneq Naalakkersuisut siuliisa unitsikkaluarpaat. Maanna Naalakkersuisut umiarsuarnik tunitsiviliisarnermut malittarisassat allanngortippaat Uummannap Upernaviullu eqqaanni unammillernermut aqqutissiuussisussamik.

Kalaallit naalagaassapput

- Tamanna siunissaq ungasinnerusoq eqqarsaatigalugu avannaani aalisakkerinermi suliffinnik amerlanerusunik pilersitsissutaasinnaavoq, aalisarnermut piniarnermullu naalakkersuisoq Karl Lyberth Siumumeersoq Sermitsiaq.AG-mut oqarpoq.

Umiarsuarmik tunitsiviliiniartut piumaffigineqarput nunami tunisassiorfimmik pilersitsinissamut pilersaaruteqassasut. Tamanna uppernarsarsinnaagaanni umiarsuarmik tunitsiviliisoqarsinnaassaaq.

Umiarsuarnik tunitsiviliisinnaanermut periarfissaq saattuarniarnermut aamma atuuppoq. Tassani piumasaqaataavoq umiarsuup naalagaasa 60 procentii kalaaliussasut taakkulu saniatigut inuttat sinneri nunatsinni najugaqavissuussasut.

Karl Lyberthip ilanngullugu oqaatigaa Upernaviup eqqaani umiarsuarmik tunitsiliiumasut ataatsit akuerineqareersut.

Powered by Labrador CMS