Populært erhverv
Qaleralinniarneq: Inuusuttut 100-t aallartinniarput
Tamarmilli piumasaqaatit naammassinngilaat. Malittarisassat nutaat malillugit akuersissummik pinissannut piumasaqaatit uani atuarsinnaavatit
Ataasinngornermi juulip 7-anni Naalakkersuisut aalisarsinnaanermut akuersissutit pisassallu pillugit nalunaarut nutaaq akuersissutigaat, taannalu marlunngornemri juulip 15-ianni atuutilerpoq.
Inuusuttunut, aalisalerusuttunut malittarisassat nutaat atuakkit UANI
Pilerigineqarsimaqaaqa, tassami Aalisarnermut, Piniarnermut Nunalerinermullu Naalakkersuisoqarfik paasissutissiivoq juulip 15-ianniilli inuussutunit, 18 aamma 29 akornanni ukiulinnit, 100-t missaanniittunit aalisarsinnaanermut akuersissummik qinnuteqarfigineqarsimallutik. Taamatut naalakkersuisoqarfik nalunaaruteqarpoq tusagassiorfinnut nalunaarutikkut.
Ajornartorsiutaavorli qinnuteqaatit arlallit amigaateqarnerat. Taamaattumik naalakkersuisoqarfik maanna inuusuttunut qinnuteqarsimasunut uppernarsaatinik pisariaqartunik pissarsiulerpoq, naalakkersuisoqarfimmit tusagassiorfinnut nalunaarmmi allassimavoq.
Nalunaarummi piumasaqaatit uppernarsarneqartussat allattorsimapput.
Tusagassiorfinnut nalunaarutikkut naalakkersuisoqarfik maanna nalunaarpoq piumasaqaatit suut naammassineqassanersut, aalisarsinnaanermut akuersissummik pisinnaanissamut. Qinnuteqartunut piumasaqaataapput:
Imaani aalisarnermut ilinniagaqarsimasuunissaq, imaluunniit
Aalisarnermut Piniarnermullu Ilinniarfimmi ilinniarsimasuunissaq, imaluunniit
allatut taamatut assingusumik sivisuumik misilittagaqarsimasuunissaq, soorlu aamma ataataasoq alliartornermini aalisaqatigisimassagaa allalluunniit ilagalugit.
Ilanngullugu piumasaqaataavoq akuerisaasumik inuussutissarsiutigalugu umiatsiaaraqarnissaq aamma aalisarnermut atortunik naleqquttunik peqarnissaq, Aalisarnermut, Piniarnermut Nunalerinermullu Naalakkersuisoqarfimmit tusagassiorfinnut nalunaarutikkut Emanuel Rosing paasissutissiivoq.
– Aalisarnermut, Piniarnermut Nunalerinermullu Naalakkersuisup Finn Karlsenip kissaataa tassaavoq inuussuttut 18-nit 29-nut ukiullit aalisarsinnaanermut akuersissummik ajornannginnerusumik qinnuteqartalernissaat. Tamatumunngalu nalunaarut allanngortinneqarpoq inuussuttut piuminarnerusumik qinnuteqartalersinnaanissaat ilanngunneqarluni, tusagssiorfinnut nalunaarummi allassimavoq.