taasinissaq
Qaasuitsup Kommuniani Siumut suli avissaartuuffiuvoq
- Avannaamiut pisinnaapput nikananngillat, Qaasuitsup Kommuniani kommunalbestyrelsimi ilaasortaq Sakio Fleischer Siumut oqarpoq
Qaasuitsup Kommuniani kommunalbestyrelsimut ilaasortap Siumumeersup Bernhardt Olsenip kommunimi kommunalbestyrelsimi ilaasortaqatini isornartorsiorpai, ilaatigut akisussaassuseqanngitsutut taallugit.
- Uummannaq Upernavik Qaanaaq massakkut suliffiit piusut, tunngaigalugit anigaasartuutissatit matusinnaanngilaat. Politikerit avannaamiut atuagassatik atuarsimanngilaat, inuillu oqallattaarneri aallaavigiinnarlugit, kommunip anigaasaqarnikkut imminut napatissinnaanngittoq pilersinniarsarivaat, Bernhardt Olsen ilaatigut oqarpoq.
Parteeqataa Sakio Fleischer Uummannameersoq isumaqarpoq, kommunip avinnissaanik taasisoqarnissaa pingaaruteqartoq.
- Innutaasunut nikassaaneq aammalu nalliginninniarneq tunngavissaqanngilluinnarpoq. Tamat oqartusaaqataanerannik pingaartitsigaanni ataqqisariaqarput innuttaasut isummersorneqarnissaat, tusagassiutinut nalunaarummi Sakio Fleischer oqarpoq.
Bernhardt Olsenip aalisartunut isiginninnera tupinnartoqartippaa.
- Ilaatigut aamma Bernhardt Olsen oqarpoq illoqarfiit Qaanaaq, Upernavik aamma Uummannaq
amigartooruteqarfiunerpaasut, tupingusuppunga aalisartoqarfissuit amingartoorfiinnartut
isigineqarsinnaappata, missuititsineqarneranik uanga ilisimasaqanngilanga taamaattumik
taamatut oqariartorneq nalornisitsiniaanermik tunngavissaqarsoraara.
- Kommunip kattussuuneqanngikkallarmata nammineersinnaaneq ingerlareernikuummat aamma kommuni avinneqassangaluarpat sapinngillat pisinnaapput aamma suleqatigiinnikkut kivinneqarsinnaavoq, Sakio Fleischer oqarpoq.
- Kommunit kattunerisa kingorna annertuumik qitiusumut eqiterussisoqarpoq, taamaalillunilu innuttaasut saaffiginnissinnaaneratannertuumik ajorseriaateqarluni, sumiffinni tamat oqartussaaqataanerup annaaneranik tamanna kinguneqarpoq. Taamaattumik innuttaasut oqartussaaqataanerat qitiutillugu isumasiuineq marlunngornermi pisussaq qilanaaraarput, Sakio Fleischer oqarpoq.
Qaasuitsup Kommuniani innuttaasut marlunngorpat tikkuussisumik taasitinneqassapput, tassani aalajangiiffigissavaat kommuni marlunnut avinneqassanersoq avinneqassannginnersorluunniit.