ukiortaaq
Qaasuitsumi annaassiniaasartunut upalungaasimasunullu ukiortaaq eqqissisimanartoq
Juullimut pinnersaatit aamma ajornartorsiutigineqarsimanngillat
Qaasuitsup Kommuniani juullikkunni ukiortaallu unnuaani qatserisartut biilii garagemiiginnarsinnaasimapput.
- Innuttaasut ikuallannerup aseruineranit putsumillu akornusernernit nalaataqarsimanngillat, tamanna nuannaarutissaavoq 2016-illu ingerlanerani ikuallatsaaliuilluni paasititsiniaanerit kinguneqarluarsimasut Upalungaarsimanermut pisortaq, Bjarne Gregersen oqarpoq.
Putsumut kalerrisaarutit
Putsumut kalerrisaarutit malussarniutit ikuallannerit aallartilaarnerini kalerrisaaripallannerisa ikuallarujussuarnissat pinngitsoortittarsimavaat. Qaasuitsup Kommuniata Annaassiniartartutut Upalungaarsimasui qaammat decembari naneruutinit qummoroortaatinilluunniit peqquteqartumik ikuallattoornernut aggersarneqarsimanngillat.
Upalungaarsimasut pisortaatali nalilerpaa, ikuallaleraluarnerit qatserisartunit ikiortissarsioqqaarnani qaminneqarsinnaasimasut pisimanissaat ilimanartoq. Ukiortaamilu unnuakkut upalungaarsimasut suliaqartariaqarsimanngillat.
Qummoroortartut ajunngitsut
Juullip ukiortaallu akornanni annassiniartartut upalungaarsimasuisa qummoroortartunik nioqquteqartut misissorsimavaat, tassanilu aamma pisortamit pitsaasutut nalilerneqarput.
- Ikuallattoornissamut misissuinerit iluarisimaarnartumik ingerlasimapput, taamaannerisalu takutippaat qummoroortaatinik tuniniaasartut Namminersorlutik Oqartussat qummoroortaatit pillugit nalunaarutaat maleruarsimagaat, taamalu isumannaallisaanikkut upalungaarsimanissaq maleruarlugu tuniniaasoqarnera takullugu toqqissiallannartuusimasoq, Bjarne Gregersen naggasiivoq.