Kommunimut qinersineq 2017
Qaasuitsoq Kujallermi Siumukkormiut avissaartuupput
Qaasuitsoq Kujallermi Siumukkormiut unnuaq isumaqatiginninniartoqareersorlu avissaartuupput, tassani ilaasortat tallimat siunissami kommunalbestyrelsip ingerlanissaanut tunngasunik IA peqatigalugu isumaqatigiissuteqaramik.
Enok Sandgreen, tallimanngormat Naja Petersen Atassummeersoq isumaqatigiissuteqarfigisimagamiuk isumaqarsimagaluarpoq Qaasuitsoq Kujallermi borgmesterinngussalluni.
Isumaqatiginninniarneq eqqumiitsoq
- Isumaqatiginninniarneq eqqumiitsorujussuusimavoq, Siumumeersoq Otto Jeremiassen unnuaq IA peqatigalugu isumaqatigiissusioqataasimasoq oqarpoq.
Taamaasillutik Enok Sandgreen aamma Nikolaj Jeremiassen naak Siumut sinnerlugu kommunalbestyrelsimi qinigaagaluarlutik isumaqatigiissut avaqqullugu inissisimapput.
Ilaasortanut marlunnut siunissaq nalunartoq
Siumumi ilaasortat marluk narrugisaasut amerlanerussuteqarlutik taasinermik tapersersuissanersut partiimiilluunniit tunuassanersut nalunarpoq. Otto Jeremiassenip Sermitsiaq.AG-illu Enok Sandgreen iluatsinngitsumik oqaaseqartinniarsimagaluarpaat.
- Enok Sandgreen sianerfigalugulu SMS-erfigisaraluarparput akineqarnerli ajorpugut, Otto Jeremiassen oqarpoq.
Siammasissumik suleqatigiinnissaq pingaaruteqarpoq
Otto Jeremiassenip pisoq unnuarlu isumaqatigiissut tupaallannartoq ima nassuiaateqarfigaa:
- Enok Sandgreen tallimanngormat borgmesterinngornissaminik suaaruteqarpoq. Taamaaliornissaminut pisussaaffeqanngilaq. Taamaattoqarneq ajorpoq. Suleqatigiit iluanni isumaqatigiittoqaqqaartussaavoq, Enok Sandgreenimullu tunngatillugu taamaattoqanngilaq, Otto Jeremiassen erseqqissaavoq, kommunimilu siammasissumik suleqatigiinnissaq pingaaruteqartoq ilanngullugu oqaatigalu.
- Siammasissumik suleqatigiittoqarnissaa qinersisartunit kissaatigineqarpoq, tamannalu pingaaruteqarpoq, Qaasuitsoq Kujallermi Siumut sinnerlugu isumaqatiginninniartut aqutsisuat oqarpoq.
Siumumi ilaasortat marluk partiimi ilaasortaaginnarnissaminnut tikilluaqqusaasut oqaatigaa.
- Partiimiit ilaluarineqanngillat. Isumaqatigiissummut isumaqataasuugunik iluassagaluarpoq. Oqarnitsituulli pissarsiarisinnaasimanngilagut, Otto Jeremiassen oqarpoq.
Siumut ullumikkut kingusinnerusukkut borgmesterip sinniisussaanik aalajangiissasut taassuma oqaatigaa.
Jess Svane uteqqissinnaavoq
Jess Svane Siumut sinnerlugu qineqqusaartut akornanni qinerneqarnerpaavoq, taannalu toqqarneqarataannaavoq.
- Kimit inuttalerneqassanersoq isumaqatigiissutiginiarlugu naapeqqaassaagut. Tamanna pissusissamisoorpoq, Otto Jeremiassen oqarpoq.