kommunip avinniarnera
Qaasuitsoq kommunerujussarmik allamik piumavoq
Avannaani kommunip avinneqarnissaanik siunnersuummi nutaami Ilulissat Qaanaarlu kommuneqatigiiginnassapput, tamannalu kommunalbestyrelsip tamarmiusup taperserpaa
Avannaata kommunia avinneqassappat avinneqarnissaa innuttaasut amerlasuut immaqa kissaatigisaattut sualutsigissanngilaq.
Qaasuitsup Kommuniani kommunalbestyrelsip isumaqatigiissup maanna Naalakkersuisunut siunnersuutigaa kommuni kommuneeqqamut kommunerujussuarmullu avinneqassasoq.
Avannaani kommuneeraq
Pingasunngormat Kangaatsiami ataatsimiinnermi periusissaq nutaaq allaanerusorlu taperserneqarpoq, tassuunakkut Avannaanut Kujataanullu avinneqaannassanani, aammattaarli tukimut - ilaatigullu aamma politikkikkut.
Avitsivikkut Qaasuitsup Kommuniata kujammut kippasissortaa avissaartinneqassaaq, angissuserujussuanili tamangajaat attatiinnassallugu.
Assersuutigalugu Ilulissat Qaanaarlu imminnut 1.086 kilometerinik ungasissusillit, kommuneqatigiiginnassapput.
Aasiaat Qeqertarsuarlu
Kommunalbestyrelsip avitsinissamik siunnersuutaa, kommunalbestyrelsimit tamarmiusumit taperserneqartoq imaappoq:
1. Kommuneeraq, tassungalu ilaassapput Qasigiannguit, Qeqertarsuaq, Aasiaat, Kangaatsiaq nunaqarfiilu.
2. Kommunerujussuaq, tassungalu ilaassapput Ilulissat, Uummannaq, Upernavik Qaanaaq nunaqarfiilu.
Kommunalbestyrelsip neriuutigaa Naalakkersuisut siunnersuutigissagaat siunnersuut sapinngisamik piaarnerpaamik Inatsisartuni oqaluuserineqassasoq.
Manna tikillugu Naalakkersuisut avitsinissamik siunnersuutit isummerfigisarsimanngilaat, tapersertarnagit tunuartittarnagilluunniit, tikkuaannartarlugu kommunip avinneqarnissaa aningaasartuutitaqassasoq.
Naggataatigut Inatsisartut aalajangigassaraat Qaasuitsoq avinneqassanersoq.