navianartoq
Qaartitsineq ajornerulersitsiinnarsinnaasoq
Qaqqami sisooriaannarmi qaartitsineq piffimmi allami sisoornermik pilersitsisinnaavoq
Qaqqap sisooriaannaap malissuarmik pilersitsisinnaasoq qaartinneqarnissaanut isuma aallaqqaammulli GEUS-imit isumaqataaffigineqarsimanngilaq.
Tamannalu qulakkeerluarumallugu ilisimatuut siunnersortigineqarsimapput nunanilu allanit misilittakkat aalajangiisuusimallutik. Inerniliussarli ersarilluinnarpoq.
- Nakkutigisamik qaartitsisoqannginnissaa sakkortunerpaamik innersuussutigaarput, GEUS-ip pisortaanerata tullia Flemming Getreuer Christiansen Sermitsiaq.AG-mut oqarpoq.
Ajornartorsiummi annertusiinnarsiinnavaa.
- Piffiit arlallit qajannartoqarput, taakkuli qaartitsinermit sunnerneqarsinnaallutik. Tamaammat qaqqa ilaa peerneqarsinnaavoq piffimmilu allami ajornartorsiummik annerusumik pilersitsiinarluni. Taamaasillutalu ajornerulersitiinnarluta, Flemming Getreuer Christiansen oqarpoq.
Iliuuserineqarsinnaasorlu tassaavoq piffiup nunap issusaanik qanimut misissuineq. Tamatuma saniatigut arlaleriarluni immiussinikkut nikerartoqarnersoq isiginnaartoqarsinnaalluni.
Piffissallu ilaani uuttortaatinik nappaasoqarsinnavoq, tassani uuttortaatit atorlugit nunap sisoorsinnaanera eqqoriarneqarsinnaassalluni.
- Uuttortaatillu imaasiallaannarnikkut pilersinneqarsinnaanngillat. Nappaanissarmi qaammatini arlalinni pisariaqassaaq, ujarassiooq oqarpoq.
Atortorussaarutinillu nappaanermi uloriarnartoqarsinnaasoq taassuma ilaatigut tikkuarpaa. Napparneqarpatali kalerrisaariaaseq tunngavilerneqassaaq.
- Qularinngilara uuttortaatinik nunap sisuulernissaanik ersarinnerusumik eqqoriaasinnaasumik nappaasoqarsinnaaneranera, Flemming Getreuer Christiansen oqarpoq.