qaartitsineq
Qaartitsilluni ajutoornermi suliami politiit akissummik utaqqipput
Sanaartugassanik suliassinneqartartoq qaaritsislluni ajutoornermut akisussaasuusoq akiligassinneqassanersoq, politiit suli aalajangiiffiginngilaat, taanna qaqqap ilarujussuanik ujaqqamik Nuummi naluttarfimmut malimmut qaartitsinikuuvoq.
Pinngortitamut Avatangiisinullu Naalakkersuisoqarfik suliffeqarfimmut peqqussuteqarsimasoq, qaartitsinermut aqutsisut suliaannillu nakkutigineqarnerinik sakkortusinissamik pisussaaffiliisoqartoq, oktobarip 15-anni Sermitsiaq.AG-p allaaseraa.
Ajoqusertoqanngitsoq
Tassami qaqqap ilaa septembarip 9-anni qaartinneqarmat annertuumik ajutoortoqarpoq. Qaqqap ilarujussua meterinik hunnorujulukkaanik arlalinnik ungasissusilimmut igeriunneqarpoq, naluttarfimmilu igalaarujussuit ilaannut tuppoq.
Maanna sanaartugassanik suliakkerneqartartumut akiligassiisoqarnissaanik politiit aalajangiisuussasut, Pinngortitamut Avatangiisinullu Naalakkersuisoqarfik oktobarip 15-anni ilisimatitsivoq.
Suliami akisussaasunngortitsisoqarnissaanut tunngavissaqarnersoq paasissutisseeqqussummik naalakkersuisoqarfik qinnuigineqarsimasoq, unnerluussisussaatitaasoq Michael Hansen Sermitsiaq.AG-mut ilisimatitsivoq.
- Oqaaseqaammik pissarsivugut, kisianni inerniliussinermik imaqanngilaq. Taammaammat naalakkersuisoqarfik nassuiaateqaqqullugu qinnuigaarput, Michael Hansen ilisimatitsivoq.
Pinerlunnermut inatsisitigut akiligassiinissamut aalajangiiniaruni, politiit ilisimatitsissummik tunngavimmik pisariaqartitsinerat taassuma naqissuserpaa.
Suliap naammassinissaa sivitsortoorpoq, Pinngortitamut Avatangiisinullu Naalakkersuisoqarfimmit suli tusagaqannginnera pissutaalluni, taakku ilisimasanik pisariaqartunik peqaramik.