Nuuk
Qaaq tusarnaartitsinerani assit takukkit
Tallimanngornermi unnukkut Kulturip illorsuaani katuami Qaaq appisimaarpoq
Qaaq aliannaartitsilaavissorpoq, Nuummi tallimanngornerup unnuaani Katuami tusarnaartitsinermini. Qularnanngilarlu unnugu afininngornermi appisimaaqqilerunik aamma taamaassasoq.
Tasarnaartitsineq qulinut aallartippoq, Sumé tributrbandi kissassaasoralugit. Sumé tributebandi appisimaarnerani tusarnaariat tunuarsimaalaarput, taamaattorli tusarnaariat kissakkiartornerat malunnarpoq, erinnat ilisarnartut soorlu ”Imigassaq” appinneqarmata.
Per Berthelsen tusarnaariat akornanni Sumé tributebandi nuannarepasillugillu tulluusimaarutsigerpasilugit, tanngassimaarluni isiginnaarpai.
QaaQ appimmat tusarnaariat kissareersimallutik scenemut qanillattorput. QaaQ erinnat ilisarnartut soorlu ”Timmissatut ilillunga” aamma ”Neriunneq” appimmagit, tusarnaariat nuannisaqaat erinarsoqataasarlutillu. Unnuk ingerlavoq erinnat eqqissisimasut qiimasullu appinneqallattaarlutik. Malunnarporlu nipilersortut piareersarluarsimasut scenemillu sungiussisimasuusut.
QaaQ erinnat atugaat asanninnermut, nunagisamut pinngortitamullu asanninnermut tunngapput, qularnanngitsumillu tusarnaarianit tigulluarneqarlutik. Nipilersuutit soorlu qarlortariaq saxofonilu kiisalu nipilersoqatigiinni inuttaasut assigiinnginnerat nipilersoqatigiit immikkuullarissuutippaat.
Tusarnaartitsineq ingerlalluarpoq, tusarnaariallu ukiui siammaseqaat, taama Katuami tusarnaartitsinermi akisussaasoq aaqqissuisorlu, Minik Hansen, isumaqarpoq.
- Unnuk pissusissamisut ingerlavoq, Katuamilu sulisut suliaminni naammassinnilluarlutik. Inuusuttu utoqqasaallu tusarnaariarput, qularnanngilarlu QaaQ siammasissunik nuannarinnitseqartoq. Inuit eqqissisimapput nuannisarllutillu, erinarsoqataasarlutik pipput, taamaammat tusarnaartitsineq iluatsilluarpoq, Minik Hansen, Tallimanngornerup unnuaani oqaluttuarpoq.
Inuit 400-ujut sinnerlugit tallimanngornermi QaaQ tusarnaariarpaat.
Qaaq nipilersortui ukuupput:
- Per Berthelsen – Erinarsortoq
- Kristian – Bass
- Lars Frederik – Saxofon
- Jim Milne – Pattattoq
- Svend Åge Hansen – Guitar
- Niels Ostermann – Tumerparpaartoq
- Krissie Berthelsen Winberg – Erinarsortoq/Tulleertoq
- Julie Berthelsen – Erinarsortoq/Tulleertoq
- Arnannguaq Gerstrøm – Qarlortartoq
- Hans Jukku Noahsen – Guitar/Ataasiakkaarisoq
- Eigil Petersen – Guitar
Sumé Tribute Band nipilersortui ukuupput:
- Jan Hansen – Erinarsortoq/Guitar
- Eigil Petersen – Akustisk guitar
- Niels Ole Olsen – Ataasiakkaarisoq
- Malik Andersen – Bass
- Nino Fencker - Tumerparpaartoq