Qaanaaq
Qaanaarmiunut mianersoqqussut: Qaanaap eqqaani nannut qaasuttut
Qaasuitsup politiivisa Qaanaami innuttaasut kaammattorpaat kisimiillutik qimussinnginnissaannut illoqarfiup ungasinngisaani nannut qaasuttut arlallit naammattoorneqareersullu
Nanoq qaasuttoq piniartumut saassussinialeraluartoq Qaanaamiit 5 kilometerimik ungasitsigusimit sapaatiummat pisarineqarpoq.
Nanoq taanna qaasuttoq, arnaviaq, Qaasuitsumi politiit oqaluttuarnerattut, piniarneqalerami piniartup qimmii qamutaalu saassussimavai.
Taamaattumik politiit Qaanaami innuttaasut kaammattorpaat Qaanaap eqqaani nannut mianersorfigissagaat.
- Kaammattuutigineqarpoq kisimiilluni qimussertoqartannginnissaa, aamma meeqqat kisimiillutik qimussertut immikkut maluginiarneqarnissaat kaammattuutigineqarluni.
Taama Qaasuitsup politiviini pisortaq, Kasper Berthelsen, tusagassiuutinut nalunaaruteqarpoq.
Nanoq alla aamma takuneqartoq
Politiit aamma kaammattuutigivaat qimussertuni inersimasumik ilaasoqartarnissaa nannunik allanik aamma takunnittoqarsimammat, soorlu aamma aallaasit nannunut qunusaarutaasinnaasut nassarneqartarnissaat kaammattuutigineqartoq.
- Ullualuit matuma siorna nanoq Qaanaap Kangerluani naammattoorneqarpoq. Angut 4. hjulinik angallateqarluni Qiqertat eqqaanut qaleralinnik aallerpoq. Angutip taassuma nanoq imminerminit 100 meterinik ungasitsigisumiittoq tungiminut aggersoq takuaa, qujanartumilli 4. hjuliminik ingerlaqqissinnaasimagami allamik pisoqarsimanngilaq, Kasper Berthelsen innuttaasut illoqarfiup avataani angalaarnerminni sillimaniarnissaminnik eqqarsaateqartarnissaannut kaammattuuteqartoq, oqarpoq.