Qaanaaq: Aamma sodavanderpassuit kasiilerneqarput

Qaanaami Pilersuisup pisiniarfiani nioqqutissat taarsersorneqarmata immiaararpassuit sodavanderpassuillu eqqarneqarput

Qaanaami immiaaqqat Heineken kisimik eqqarneqanngillat

Qaanaami nioqqutissaatit nioqqutissanik nutaanik taarsersorneqarput, taarserneqarnerisali kinguneranik sodavanderpassuit immiaararpassuilul eqqarneqarput. Tassami immiaaqqat Heineken 5.700-t kisimik iginneqanngillat. Aamma Tuborgit Carlsbergillu ulloq tuniffissaat kingulleq qaangiussimasoq eqqarneqarput.

Atuaruk: Qaanaami immiaaqqanik eqqaanersuaq

Umiarsuit assartuutit marluk ukiumut Qaanaamut tikittarput. Aggustip naalernerani ukiumi umiarsuup kingulliup tikinnissaa sioqqullugu nioqqutissaateqarfimmi nioqqutissanut nutaanut inissarsiuisoqartarpoq. Ukioq manna Pilersuisoq immiaaqqanik sodavandinillu, ukioq manna ulloq tunisiffissaat kingulliusunik, amerlavallaanik pisisimavoq.

– Sodavandit immiaaqqallu 30.000 missaanniittut kasiilersimavagut. Tamatumunnga pissutaavoq immiaaqqanik sodavandinillu tunisavut ukiumut siulianut sanilliullugit 35.000 ikileriarsimammata. Nioqqutissat tamarmik eqqaavissuarmi suujunnaarsinneqarput, Pilersuisumi tuniniaanermut pisortaq Jonas Aronsen Sermitsiaq.AG-mut oqarpoq.

Sermitsiaq.AG-p marlunngormat oqaluttuaraa immiaaqqat Heineken 5.700-t Qaanaami eqqarneqarsimasut. Aammattaarli Pilersuisup Qaanaami pisiniarfianit Tuborgit Carlsbergillu amerlasuut tunitsivissaat qaangiuttoorsimasoq eqqarneqarput.

Powered by Labrador CMS