Qaanaap imartaani aalisartoqarnissaa Karl-Kristian Krusep neriuutigaa

Karl-Kristian Kruse (S) ulluni makkunani inuussutissarsiorneq sulisoqarneq pillugu Qaanaami isumasioqatigiinnermut peqataavoq.

Taanna ullumi sisamanngornermi oqalugiarami nunatsinni aalisarnermik inuussutissarsiuteqartut, illoqarfiit avannarpasinnerpaannut appakkaannissartik isumaliuutigissagaat kaammattuutigaa.

Tassami tamaani piareersimapput, taanna oqarpoq.

- Takusinnaavara aamma nalilersinnaavara piniartut aalisartunngornissaminnut piareersimasut. Paasivara Qaanaami piniartut aalisartullu 20-nit amerlanerit qaleralinniarnermi amoorutip atornissaanik siorna pikkorissartitsisoqarmat peqataasimasut. Tamatuma takutippaa piniartut aalisartullu qaleralinniarnissamut soqutiginnittorujussuusut, Kruse oqarpoq.

Iliuuseqartoqarnissaa neriuutigaa
Qaanaap eqqaani aamma nunaqarfiusimasup Qeqertat kangerluani immap itissusianik misissuisoqarnissaanik kissaateqartoqarnera naalakkersuisunut ilaasortap tapersersorpaa, aammalu misileraalluni aalisartoqarnerunissaa, amerlanerpaanik pisaqarsinnaanissaq siunertaralugu.

Politikkikkut taamatut tapersiineq qanoq piviusunngortitsissanersoq, politikerip oqaluttuarinngilaa.

Atuaruk: Nunaqarfeeraq qaleralinnik annertuumik tunisassortoq

Taanna isumasioqatigiinnermi oqalugiarami Sisimiuni aamma Lyngbymi issittumi teknologimik ilinniarfiup nalunaarusiaa, Qaanaap eqqaatalu sanaartorfigineqarnera inuussutissarsiutillu tunngavigineqartunut tunngasoq isiginngitsuussaarsinnaannginnerarpaa.

Imilersorneqarneq ajortoq
Nalunaarusiap erseqqissarpaa, piffimmi aalisartunut aporfippassuit. Qaanaaq imeqarniarnerminik ajornartorsiuteqarpoq, tamatumalu tunisassiorfeqarniarneq ajornakusoortippaa.

Tatsimik imilersuisinnaasumik peqanngilaq. Aasami qaammatini sisamani illoqarfik kuummit imilersorneqartarpoq, Nukissiorfimmi tankersuit marluk immerneqartarput.

Naalakkersuisoq paasinnittoq
Qaluutarsuit sikumi qaammatini kingullerni sisamani nilattaassutigineqartarput, nilak Nukissiorfimmi immikkut suliami aasserneqartarluni, tassanngaanniit imermik pilersuisoqalersarluni.

Krusep aamma oqaatiginngilaa, imeqarniarnermik ajornartorsiuteqarneq qanoq iluarsineqarsinnaanersoq, taamaattorli isumasioqatigiinnermi amigaateqarnermut paasinnilluni oqaatigaa.

Ajornartorsiut ullut ilaanni iluarsiivigineqassappat, nunaqarfiusimasup Qeqertat eqqaanni aalisarneq pilerinarninngorlunilu ingerlallualissagaluarpoq, tassani qalerallit amerlanersaat anginersaallu aalisarnerarneqartarpaat.

Aalisarfik 60 kilometerisut ungasitsigisoq
Qeqertat eqqaanni qalerallit aamma qilalugarpassuit pisarineqartareerput, taakku qimussimik, qamuuteralannik biilinilluunniit Qaanaamut kilometerinik 60-it missaanni ungasitsigisumut assartorneqartarput, siku isumaannaatsillugu.

- Taamaattumik Qeqertat Qaanaap eqqaani piniagassarissaarpoq aalisagaqarnerullunilu, immaqa inuussutissarsiornissamut inuuniarnissamullu periarfigissaarnerulluni. Isumaqarpunga maani piujuaannartitsisumik tunngaveqarluni aalisartoqarsinnaasoq. Taamaattumik neriuutigaara aalisarnermik suliaqartut, kommuni maanilu najugaqartut, najukkassi eqqaani aalisarnerup ineriartortinneqarnissaanut periarfissat pillugit suleqatigilluassallusi, Siumumi politikeri taama kaammattuuteqarpoq.

Atuaruk: Naalakkersuisut Qaanaami innuttaasunik ataatsimeersuartitsissapput