Qaanaap eqqaaniit assit kusanarluinnartut

Assit kusanarluinnarput. Nakusariaqarluniluallaat: Assilisaruna qalipagarluunniit? Assimiuna suna takuneqarsinnaasoq? Sermip aakkiartornerata kusanarluinnartumik ilusinissimanera assilineqarsimasoruna.

Piniartut pillugit atuakkiaq
Assiliisartoq ilisimaneqarluartoq Henrik Saxgren 2013-mili ukiukkut Qanaap nunaqarfiinut angalasarpoq.
Atuakkiamut 'Ultima Thule'-mik atilimmut, tassa nunarsuup killinganik europamiut taasimasaannut, assilisat atorneqarput. Atuagaq piniartut inuunerannut tunngasoq upernaaru saqqummissaaq.
- Sikusimasumi aqqutigiuminaatsumilu pinngortitami kusanarluinnartumi uumasut inuillu akiuunnerannut, inuit pinngortitallu akiuunnerannut, pinngortitallumi imminut akiuunneranut Saxgrenip assilisaarsimavaa, Galleri Hans Alf tusagassiuutinut nalunaarummi allappoq.

Eqqumiitsulianut katersugaasiviup nittartagaani assit amerlanerit takukkit

Namminersorluni saqqummersitsineq
Saqqummersitaq '76° N' eqqumiitsulianut katersugaasivimmi Hans Alf-imi takuniarneqarsinnaasoq namminersuutigalugu suliaavoq. Henrik Saxgren qulimiguulimmik Qaanaap nunaqafiinut ingerlaartilluni pinngortitap kusanassusersua maluginiarsimavaa. Assiliisartullumi assilisani qanoq nassuiaatissalissanerlugit oqaasertaleruminaatsippai.
- Tunniutiinnareernikkuvunga, assilisaarereeraangamami takusassat kisimik ersertarput: Nunarsuarmut qanoq isiginnittaaseqarnersunga assilisanni takuneeqarsinnaasarmat, Henrik Saxgren oqarpoq.

ATUARUK: Sorsunneq asanninnerlu Katuami

Sorsunneq asanninnerlu
Henrik Saxgrenip Nunarput siornatigut tikittareersimavaa. Atuakkiami 'Krig og Kærlighed - om indvandring i Norden', tassa 'Sorsunneq asanninnerlu – Avannaata nunasiaatinngornera'-nut suliarineranut atatillugu Nunatsinniittareersimalluni. Tassani Ikuo Oshima Kalaallit Nunaanni inoqarfiit avannarlerpaartaanut Siorapalummut piniartutut inuulersimanera pillugu atuakkiaminut assiliiartortarsimalluni.