Royal Arctic Line
Qaanaamut nassiussat immikkut ukkatarineqartut
KNI-p aamma Royal Arctic Linep nassiussat Qaanaamukartut umiarsuarmut usiliunneqarsimanersut immikkut ukkatarisimavaat, taanna pingasunngormat Nunatta avannarpasissuanut aallarpoq.
Royal Arctic Linep umiarsuaanut containerit eqqortut usilersuutigineqarnissaat annertuumik ajornartorsiutigalugit umiarsuaatileqatigiiffiup upernaarli unammillernartissimavaa, tassani it-systemi nutaaq atulerneqarnikuunera pissutaalluni.
Qaanaaq umiarsuarnit pajuttaatinit ukiumut marloriaannarluni tikinneqartarpoq, taammaammallu innuttaasut avannaaniittut inniminnikkatik pissarsiarissagaat immikkut ittumik maluginiarneqarpoq.
- Qaanaamut aallartoq annertuumik ukkatarineqarpoq, aammattaaq KNI suleqatigalugu nassiussat inniminnikkat Aalborgimi poortorneqarnissaminnut angumerineqarnersut malitseqarnissaat nukittorsarneqarnikuuvoq, Royal Arctic Linep pisortaa Verner Hammeken, Sermitsiamut taama ilisimatitsivoq.
- Tamatumunnga tunngatillugu Royal Arctic Linep iliuuserisinnaasani iliuuserigaa isumaqarpunga. Septembarip naanerani aamma Ittoqqortoormiinut umiarsuaq kingullermut taamaaliortoqassaaq, umiarsuaatileqatigiiffiup pisortaa naqissusiivoq.
Umiarsuaq ''Malik Arctica'' pingasunngornermi Aalborgip umiarsualivianit Qaanaaliarluni aallarpoq. Septembarip sisamaanni nalunaaqutaq 07.00 tikissasoq naatsorsuutigineqarpoq.