piujuaannartitsineq
Qaanaamut aaffattassat qulit
Ukiup sinneranut Qaanaami aarfattassat immikkut qulinik amerlineqarput. Akerlianik 2014-imi pisassat amerlineqarunanngillat
Naalakkersuisut 2013-imi oktobarip 14-ianni politikkikkut aalajangiipput ingerlatsiveqarfimmi Qaanaami 2013-ip sinneranut aarfattassat qulinik amerlineqassasut, Avanersuarmit saaffiginnissut malillugu.
Aarfattassa qulinik amerlineqarnissaat Pinngortitaleriffimmut tusarniaavigineqarsimavoq, Pinngortitaleriffiullu oqaatigaa aarfit amerlassuserigaluakkaminnit ikinnerungaatsiartut. Ilanngulluguli oqaatigineqarluni ilisimatuut inassuteqaataat malinneqartillugit aarfit amerliartoqqilersinnaasut.
Taamatut paasissutissiivoq aalisarnermut, piniarnermut nunalerinermullu Naalakkersuisoq Karl Lyberth. Tamanna pivoq Siumumeersumut Kristian Jeremiassenimut akissummini, taassuma paragraf 37 naapertorlugu pisassat apeqqutigisimammagit Qaanaamilu pisassat amerlineqarsinnaanerat aamma apeqqutigalugu.
– Isumaqarluinnarpunga artinut pisassiissutaasartut, aamma aavernut, amerleqattaartittuartillugit nungusaataanngitsumik tunngavimmik ajornartorsiut piffissamut kingusinnerusumut kinguartinneqartoq. Aallaaviusariaqarpoq illua'tungeriit tamarmik pisariaqartumik naliliinissaat pisassiissutaasartullu siumut isigisumik ingerlallugit. Tamatumuunakkut ilaatigut nungusaataanngitsumik tunngavik qulakkeerneqassaaq, tamatta tamanna piumagatsigu, aammattaarli piniagassat atornissaat atorfissaqartikkatsigu, inuit nerisassarippatigit imaluunniit qimminut nerukkaataassappata, Karl Lyberth akivoq.