nipilersorneq

Qaanaami tusarnaatsitsinerit assigiinngitsut

Juaaka Lyberth Leif S. Immanuelsenilu Qaanaami nipilersoriaatsinik assigiinngitsunik tusarnaartitsinermut qaaqqusipput. Qilaatersornerit pattannerillu ilaatigut tusarnaariarneqarsinnaassallutik

Juaaka Lyberth, glad

Aqagu Qaanaap timersortarfiani tusarnaartitsisoqalerpat nipilersoriaatsinik assigiinngilluinnartunik tusarnaariat misigisaqarsinnaassapput.

Qilaatersorneq, pattagissamik nipilersuataarneq, erinnat taallallu guitariinnarmik nutsugissamillu kiisalu inuusuttorpalaartumik rock’n roll ilaatigut tusarnaariarneqarsinnaajumaarlutik.

Nipilersortartut ilisarisimaneqarluartut Juaaka Lyberth Leif S. Immanuelsenilu unnuup ingerlanerani arlaleriarlutik appittaqattaassapput.

Unnuup nipilersorfiup immikkoortua siulleq qilaatersortartunik inuusuttunik ”Angakkut”-nit aallarnerneqassaaq. Pattattartoq inuusuttoq Anda Peter Karlsen Juaaka Lyberth Leif S. Immanuelsenimullu kissassaasuussaaq. Taakku taallat, erinnat kalaallillu upperisatoqaat aliikkusersuutigissavaat, guitarimik nutsugissamillu ingiuutigalutik. Unillatsiarneranni inuusuttut rock’n rollertartut ”Inuusuttuaqqat” appisimaalaassapput.

Unnuup immikkoortuata aappa Qaanaami nipilersortartut peqatigiiffiata NIPEQAA-p aaqqissuutissavaa, nalunaaqutaq 23.00 aallartittussaq. Tusarnaarneqarsinnaassappullu Qaanami nipilersoqatigiitartut assigiinngitsut, ass. PUJU, TAQQAT, Qanooq-Jam, nipilersortartullu tikeraat Juaaka Leiffilu akuullattaarumaarput.

Juaakap Leiffillu Qaanaami nipilersuataarnerat ullumi ualikkut meeqqerivimmi meeqqat erinarsuutaannik aliikkusersuillutik aallartereerput.

Powered by Labrador CMS