Avannaata Kommunia
Qaanaami suleqatigiissitaq pilersinneqartoq
Avannaata Kommuniani borgmesteri, Palle Jerimiassen (S), Qaanaami suleqatigiissitamik suligasuartussamik februaarip 22-anni pilersitsivoq
Suleqatigiissitap isumaliutissiissutini apriilip 11-anni tunniutissavaa. Avannaata Kommunia tusagassiuutinut nalunaarummi taama ilisimatitsivoq.
- Qaanaami inuttut atukkatigut, avatangiisitigut, sunngiffimmi susassaqarniarnikkut, kulturikkut iliuusaasinnaasutigut allatigullu innuttaaqataasunut pitsaasumik suliniutigineqarsinnaasunik ukiorpassuarni amigaateqartuarsimavugut, Avannaata Kommuniani borgmesteri, Palle Jerimiassen, taama oqarpoq.
Aamma atuaruk: Qaanaami aalisarneq siuariartortoq
Iliuusissanut siunnersuutit
Taassuma erseqqissarpaa, avataaniit suleqatigiissitanik iliuusissanik siunnersuuteqartitsisarnerit annertunerusumik sunniuteqarneq ajortut. Taamaattumik borgmesteri suleqatigiissitaliorpoq kommunalbestyrelsimut naalakkersuinikkullu ingerlatsisunut allanut siunnersuusiortussanik Qaanaarmiunik inuttalersukkanik.
- Taakku sunilluunniit siunnersuusiorsinnaassapput inuiaqatigiinnut Avanersuarmiunut iluaqutaasinnaasunik, borgmesteri oqarpoq.
Suleqatigiissitaq
Ataatsimiititaliami uku inuttaapput:
- Avatannguaq Imina
- Helle Holm Petersen
- Mika Oshima Etah
- Masauna Holm Petersen
- Dan D Normann
- Arrutaq Qujaukitsoq
- Tolu Oshima