Qaanaami qaleralinniarneq malunnaatilimmik siuariartoq

Tunisisarnerup annertusiartuinnarnerata kinguneraa, tunisassiorfimmi sulisut amerlanerulernerat. Royal Greenlandip nittartakkamini ilisimatitsissutigaa, sulisut tallimaasimasut maanna 15-it 19-illu akornanni amerlassuseqalersimasut.

Ilinniartinneqartut

Saattuni Royal Greenlandip tunisasiorfiani sulisoq misilittagalik maanna Qaanaami tunisassiorfiup sulisuinik qaleralinnik paperuikkanik niaquikkanillu tunisassiortarneq pillugu ilinniartitsiartorluni Qaanaamiittoq, suliffeqarfissuaq ilisimatitsivoq.

- Qaanaani tunisassiorfimmi sulisut aalisakkanik tunisassiorsinnaanermik maanna ilinniartinneqarput, taamaattumik tunisassiorneq ingerlallualeriartuinnarpoq aamma ullormut tunisassiat annertusiartorput, Royal Greenlandimi tunisassialerinermi ingerlatsisoq, Niels Ole Møller oqarpoq.

Aalisartut aamma aalisarluarnerulernikuusut aamma Qaanaap eqqaani aalisarfiit annertunerusut aalisarfigilernikuummatigik Qaanaami aalisarneq aalisakkanillu tunisassiorneq siuariartuinnartoq, taassuma oqaatigaa.

Tunisat amerliartuinnartut

2013-imi Royal Greenlandip Arctic Greenfoodip tunisassiorfia pisiarigamiuk Qaanaami aalisartut piniartullu piginneqatigalugit Inughuit Seafood A/S pilersippaat. Taamanikkut Qaanaani aalisartut ukiumut qalerallit 20 tonsit tunisarpaat, kingorna qaleralinnik tunisineq annertusivoq 2014-imilu 110 tonsit tunineqartut 2017-imi qalerallit 193 tonsit tunineqarlutik, Royal Greenland ilisimatitsivoq.

Qaanaami aalisarneq siuariartortoq

- Ukioq manna januarip aallaqqaataaniit marsip allartinnera tikillugu qalerallit 115 tonsit tunineqareerput. Junip aallartinnera tikillugu aalisarnerup ingerlaannarnissaa naatsorsuutigigatsigu neriuutigaara ukioq manna aamma qaleralinnik tunisilluartoqarumaartoq, Niels Ole Møller, suliffeqarfiup nittartagaanut oqarpoq.

Qaanaami alisartut 55-it missaaniittut Inuighuit Seafoodip tunisassiorfianut maannakkorpiaq tunisisarput.