Pituffik
Qaanaami piniartut: Suka K. Frederiksenip sumiginnarpaatigut
Nunanut allannut naalakkersuisup Suka K. Frederiksenip akissutaa Qaanaap eqqaani piniartut naammaginngilluinnarpaat. ''Pissutsinik ilisimasaqarani qisuariarpoq'', piniartut naqissusiipput.
Piniartut Pituffimmut orseriartorsinnaanatillu pisiniarfiliarsinnaannginnertik kamaatigaat. Taamaattumik KNAPK-mi siulittaasoq Henrik Sandgreen ammaassisoqarnissaa pillugu Suka K. Frederiksenimut saaffiginnippoq.
Sukap piniartunut akissutaa
Piniartut Suka K. Frederiksenimit ima akissuteqarfigineqarput:
- Qallunaat illersornissamut forbindelsesofficeri nalunaarutigaa Pituffimmi sakkutooqarfimmi ingerlariaaseq malillugu, nunaqartut umiatsiaminnik orsiinissamut periarfissaqarmata sakkutooqarfimmi orsussaq (benzin) naammattoq pigineqarpat. Orsiisarfik US Air Forcemit pigineqaranilu aqunneqanngilaq, piginneqatigiiffimmilli sakkutooqarfimmik aserfallatsaaliillunilu aqutsisumik pigineqarluni. Piginneqatigiiffiup sullissinermini orsussamik tuniniaanermini nalilersuisarpoq orsussamik peqqumaatigisaq naammattoq pigineqarnersoq naliliinermilu tamanna aallaavigisarlugu, Suka K. Frederiksen allappoq.
Taamatuttaaq aamma danskit kiffartuussisut ingerlatseqatigiiffianni pisiniarfimmut ingerlanneqartumut pisiniarnissamut periarfissaqartoq, KNAPK-mut akissummi atuarneqarsinnaavoq.
Aamma atuaruk: Suka: Nunaqavissut Pituffimmut isersinnaapput
- Tamanna tunngavigalugu ukiorpassuarnilu isumaqatigiissutit atuuttut malillugit, innuttaasut piniartullu piffinni pineqartuni, KNAPK-mi ilaasortat ilanngullugit, Pituffimmut aqqusaarsinnaatitaapput, Suka K. Frederiksen allappoq.
Oqaatigineqartut ilisarisinnaanngikkaat
Qaanaap eqqaani piniartut oqaatigineqartut ilisarisinnaanngilaat, tamatumalu KNAPP Qaanaameersoq Mads Ole Kristiansen qisuariaateqartippaa.
- Ilumoorneraasinnaanngilagut Pituffik ammanerassallugu, taamaallaat ukiumut piffissaq aalajangersimasoq Pituffik ammasarpoq, tassa Arm Force Dayimik taasami qimusserartitsinialeraangami. Inuinnaat imaasiinnarlutik isersimasinnaanermik korteqanngikkunik Pituffiliarsinnaangillat, aamma piffissaq sioqqullugu nalunaarsimanngikkaanni isertoqarsinnaanngilaq, kiisalu Pituffimmiinniarnaanni Pituffimmi sulisumik attaviginnittoqaqqaartussaavoq, ilisarisimasaqarani Pituffimmiinneq ajornarpoq, Mads Ole Kristiansen tusagassiuutinut nalunaarummi allappoq.
- Pissutit taamaapput, Amerikkamiut Nunatsinni aapattut Saka K. Frederiksenip aapaqatigiiunnaarlugit saaffiginnissut tunngavissiortariaqarpaa, Inugguillu ikiorniarlugit qanoq iliuseqarluni. Taamak ammatigisimappat soormi taava ilisimatinneqanngilagut. Pereiaaseq kusananngilaq, Mads Ole Kristiansen allappoq, Suka K. Frederiksenip Qaanaami KNAPP Pituffimmi ataatsimeeqatiginissaanut taanna kajumissaarivoq.
Ilumuunngitsoq aaqqinneqartariaqartoq
Nunanut allanut naalakkersuisoq misissuisariaqartoq taanna isumaqarpoq, ilumuunngitsoq iluarsineqarniassammat. Ilaginnarneqartutut misigisimapput.
- Pissutinik ilisimasaqarani qisuariarnini utoqqatsernermik taarserlugu Inugguit piniarfimminni arsaakkat sullittariaqarpai, Qaanaami KNAPP-mi siulittaasoq allappoq.