Qaanaami misileraalluni aalisarneq aallartippoq

Piniarnermik inuussutissarsiorneq ullumikkut qaangerniagassaqarpoq imaannaanngitsunik, tassanilu aalisarneq suliffissanut nutaanut periarfissaasinnaasoq, Naalakkersuisut neriuuteqarput.

- Inuussutissarsiornissamut periarfissat taakku piniartullu aalisalernissamut piumassuseqarnerujussuat tunngavigalugu pinngitsoorneqarsinnaajunnaarpoq Qaanaap imartaata misissuiffigineqarnissaa, Aalisarnermut Naalakkersuisoqarfik sisamanngornermi allappoq.

(Misileraalluni aalisarneq suunersoq, paasissutissani atuaruk)

Atuaruk: Assagiarsunniarneq nannunniarnerlu unitsinneqartut

Pilersaarut nutaajunngitsoq
Naalakkersuisutut suaarutigineqaqqammersup, Nikolaj Jeremiassenip (S) ilaatigut atorfimmi siuliminit, Karl Kristian Krusemit (S), pilersaarutit ingerlanneqartut nangippai.

Qaanaap eqqaani sinerissap qanittuani misileraalluni aalisarnermi qalerallit, saarulliit, nataarnat aamma aalisakkat allat aalisarneqassasut eqqarsaataavoq.

Aalisarnermut pilersaarut piumasaqaataasoq
Aalisarnermi ningittakkat, qassutit, pullatit aamma qassutit nunamit pitunneqarsimasut atorneqarsinnaapput. Aalisarneq imartami sinerissamiit aamma titarnerup aalisarnikkut oqartussaaffigisamut tunngaviusumik killigititamit sømilit pingasut avataanut pissaaq.

Aalisariutit akuersissummik tunineqartut aalisariutinik mikinerusunit tunitsivittut aamma atorneqassapput.

Ingerlatseqatigiiffiit qinnuteqartut Naalakkersuisoqarfimmut aalisarnissaminnut pilersaarutigisartik ilanngutissavaat. Pilersaarummi nassuiaassutigineqassaaq ingerlatseqatigiiffiup imartaq qanoq annertutigisumik siaruarsimatigisoq misileraaffigissallugu.

Aalisarneq pillugu allaaserisat tamaasa atuakkit