Qaanaami meeqqat sanngiitsumik inissisimasut kommunimit sumiginnarneqarput
Meeqqat illersuisuat meeqqat ilaqutariillu ajornartorsiutit aaqqinneqarnissaannut siunnersuutaannik katersuisimavoq.
MIP-p siorna juunimi Qaanaaq tikeraarpaa. Meeqqat illersuisuata Aviâja Egede Lyngep angalanermit nalunaarusiaq borgmesterimut Palle Jerimiassenimut aamma Avannaata Kommuniani kommunalbestyrelsimut saqqummiuppaa.
Aviâja Egede Lyngep angalanermini ilaqutariit meeqqanut pitsaanerpaamik kissaassinerannik misigisaqarpoq.
- MIO-p angalanermit nalunaarusiaani takuneqarsinnaavoq meeqqat atugarisaannut pisinnaatitaaffiinullu tunngatillugu ilaqutariit angajoqqaallu akornganni annertuumik pimoorussisoqartoq. MIO-p paasivaa taamaattoqarnerata kingunerisaanik assorsuaq inuppalaassuseqartoqartoq, aammalu ilaqutariit Qaanaarmiullumi akornganni meeqqat pitsaanerpaamik atugaqarnissaannik kissaateqartoqartoq, taanna tusagassiuutinut nalunaarummi allappoq.
Ajornartorsiutinik annertuunik aamma siumugaqarpoq.
- Nalunaarusiamili aamma takuneqarsinnaavoq Naalagaaffiit Peqatigiit Meeqqat Pisinnaatitaaffiinut tunngatillugu Isumaqatigiissutit iluanni allagaqaatit 18-it piviusunngortinnissaannut Avannaata Kommunia unamminartorsioqisoq. Meeqqat angajoqqaallu Qaanaamiittut sanngiitsumik inissisimasuusut, piaartumillu ikiorneqarnissaminnik ikorfartorneqarnissaminnillu pisariaqartitsisut ikiorneqarneq ajorput.
MIO-p Qaanaamut angalasimaneranut tunngatillugu paasisat pingaarnerit kingulliit pillugit borgmester Palle Jerimiassenimut kommunalbestyrelsemilu ilaasortanut Ilulissani saqqummiussisoqaqqammerpoq, tamanna uani ataasinngormat marlunngormallu pivoq.
Nalunaarusiami innersuussutit, Qaanaami meeqqanit ilaqutariinnillu siunnersuutigineqartunik aallaaveqarput.
- Meeqqat innuttaasullu nammineerlutik inuunertik nalunnginnerpaajuaat namminnerlu qanoq iliortoqarsinnaanera pillugu siunnersuuteqarput. Taamaattumik nalunaarusiami aamma allassimapput Qaanaarmiut namminneq siunnersuusiaat. Oqaasiisa siunnersuutaasalu tusaaniarneqarnissaat pingaaruteqartorujussuuvoq, taakkuami namminneq nalunnginneruaat suut ajornartorsiutiginerlugit, borgmester Palle Jerimiassen (S) allappoq.
Isumasioqatigiinnermi kommunalbestyrelsemi ilaasortat kommunemilu aqutsisut meeqqat pisinnaatitaaffiinut tunngatillugu Avannaata Kommuniata qanoq ililluni Naalagaaffiit Peqatigiit Meeqqat Pisinnaatitaaffii pillugit Isumaqatigiissutaasa piviusunngortinnissaat anguniarlugu pingaarnersiuillutik innersuusiaminnik saqqummiussipput.
- Borgmesterip, kommunalbestyrelsemi ilaasortat atorfilittallu naapitserusunnermik suleqatigiikkusussutsimillu takutitsinerat qujamasuutigaara. Qaanaami meeqqat inuunerminni pitsaasumik toqqammaveqalernissaat anguniarlugu peqatigiilluta qulakkeerinissatsinnut neriuuteqartilersippaatigut, meeqqat illersuisuat Aviâja Egede Lynge oqarpoq.
Qaanaamut angalaneq meeqqat illersuisuata angalanerisa kommunini tallimassaraat. Uummannaq, Upernaviup nunaqarfii, Tasiilaq, Kommune Kujalleq aammalu Qeqqata Kommunia tikeraareeramigit.