Qaammataasatigut attavilunnissaq
Ukiut tamaasa piffissap imaalinerani qaammataasamut attavik kipisaqattaalersarpoq seqernup maligaasaasa ajoqusersuinerat pissutigalugu.
Ataasinngornermi oktoberip arfineq-pingajuaniit marlunngornermut oktoberip 23-ata 2018 tungaanut, innuttaasut qaammataasakkut attaveqarfinniittut attavii kipisaqattaartarsinnaapput.
Attaveeruttaqattaarnerit qaammataasakkut attaveqarfiusuni ukunani pingaartumik malugineqassapput: Qaanaaq, Pituffik, Savissivik, Upernavik, Upernavik Kujalleq, Danmarkshavn, Nerlerit Inaat, Ittoqqortoormiit aammalu Tasiilaq, Tele-Post tusagassiuutinut nalunaarummini allappoq.
Akunnermik ataatsimik sivisussuseqarsinnaasut
- Sumiiffiit ilaanni minutsini tallimani attaveeruttoqartarsinnaavoq, sumiiffiillu ilaanni nal. 11-miit 13-ip tungaanut akunneq ataaseq angullugu sivisussuseqartarsinnaassallutik.
Seqernup maligaasaasa ajoqusersuinerat pilersarpoq seqineq qaammataasallu tigooraavia naligiikkaangata, tassa qaammataasap tigooraaviata seqinermiit ”nipiliornerit” tigooraleraangagit. Seqernup qinngorneri qaammataasamit sakkortunerusarput, seqernullu nipiliornerata qaammataasamiit signali nipaarutsittarpaa, ingerlatseqatigiiffik ilisimatitsivoq.