Puisit pillugit sakkortusisamik EU-mi siunnersuuteqarnerata IA-mit ernumagineqarpoq

(Allaaserineqartoq nalunaaqutaq 11.06 nutarterneqarpoq)

Inuit Ataqatigiit Folketingimi ilaasortaatitaat, Johan Lund Olsen, EU kommissionip puisinit nioqqutissiat EU-mi tunisaaneri pillugit sakkortusisamik siunnersuuteqarneranut akerliuvoq.

Siunnersuuteqartoqareersup kinguninngua IA-mi folketingimut ilaasortaq nunanut allanut ministerimut Martin Lidegaardimut Radikale Venstremeersumut tamanna pillugu apeqquteqarpoq, apeqqutaanullu akineqaqqammerluni.

'Siunnersuutip aamma Kalaallit Nunaata puisinit tunisassiaat EU-mut niuverutigineqartut killilersulersinnaavai. Aamma nuna alla assingusumik iliuuseqarniaruni kinguneqapiluutaaratarsinnaavoq, Martin Lidegaard Sermitsiaq.AG-mi sisamanngormat allaaserineqartumi oqarpoq.

Paatsoortoqartannginnissaa anguniarneqarpoq
Ministeri allappoq,'EU-mut erseqqissarneqarsimasoq, EU-p paasissutissiinermi suliassaq isumagisariaqaraa, Kalaallit Nunaannilu puisinniartarneq pillugu paatsuuinerit nungusartariaqarai, inatsisinik unioqqutitsinani puisinit nioqqutissiat Kalaallit Nunaanneersut atuisartunit tatigineqaqqilernissaannut tunngavissatut', tamanna Sermitsiaq.AG-mit sisamanngormat aamma allanneqarpoq.

- Maanna misissussavara pissusiviusut tunngavigalugit EU-mi paasissutissiinermik suliassaq qanoq suliarineqartarnersoq, tamanna pingaaruteqarluinnarpoq atuisartut Europamiut paasissappassuk Kalaallit Nunaanni puisinniarneq tassaasoq inuussutissarsiut nungusaataanngitsoq inatsisinillu unioqqutitsinngitsoq. Aamma Bruxelles-imi politikerit qanimut oqaloqatigerusuppakka, Johan Lund Olsen oqarpoq, nangillunilu:

- Taamaammat matuma allannera ilutigalugu allaffitsinnit EU kommissionimi aamma Europa Parlamentimi suliaq pillugu oqaaseqartarunik qaammat una ataatsimeeqateqarnissaq pilersaarusiorneqarpoq. Matumunnga suliaqartugut tamatta ulappuppugut, tassami siunnersuut ukioq manna oktoberimi aalajangiiffigineqartussaavoq, IA-p folketingimi ilaasortaatitaa oqarpoq.