assit takukkit
Puisit amiinik nittarsaaneq tusagassiorfinnit sammineqarluarpoq
EU-mi puisit amiinik tuniniaaneq siuarsarniarlugu tapersersuilluni Christiansborgimi tusarniaanermik aaqqissuussinernillu allanik paasisitsiniaaneq ullumi naggaserneqarpoq
Toqqaannartumik aallakaatitsillutik najuupput Danmarks Radio, TV2 aamma TV2 News. Kiisalu sumiiffimmi tusagassiorfiit arlallit, minnerunntsumik nunatsinnit tusagassiorfiit.
KNAPK-p sapaatip akunneranik sivisussusilimmik puisit amiisa EU-mi tunisaanerulernissaannik siuarsaaniarnera tusagassiorfinnit malinnaaffigineqartorujussuuvoq. Tuniniaaneq tamanna ukiuni kingullerni appariarujussuarsimavoq siuariartornissaalu ilimanaateqarani, EU puisit amiinik inuannut inunnut Nunatsinneersunut immikkut atugassaqartitsigaluartoq. Paasisitsiniaaneq naggataarneqarpoq Københavnip qeqqani Højbro Plads-imi seqinnarissuup ataani, tassanilu peqataapput qallunaat kalaallillu untritilinnik arlalinnik amerlassusillit.
Tassani oqalugiartut ilagaat Leif Fontain, taassumalu amernik nungusaataanngitsumik piniarnermut akerliuniarneq pisuusaarnersuaq saassuppaa. IA sinnerlugu folketingimut ilaasortaq Sara Olsvig telefonikkut Nuummit peqataavoq, nipilersornermillu nuannivissumik akunniliisarput AkTjiks, tassaasut arnat erinarsortartut Aviaja Lumholt, Nukaaka Coster.Waldau aamma Karina Møller.
Tamulugassaqartitsisoqarporlu. Igasut tusaamasat Nikolaj Kirk, Mikkel Maarbjerg aamma Anso Hardenberg puisiip neqaanik suaasalerlugit sassaallerput, inngilit mamartuliaat misilissimasuugunikkit tipaatsullutik erinarsuutigisinnaasaannnik.
Leif Fontain-ilu qungujussaaleqinngilaq, puisit amiinik tunisinerup annertusarnissaanut suliassaq imaannaanngikkaluartoq, piniarnermik inuussutissarsiortut atugarliortut, aningaasaqarniarlutik arlalinnik sammisaqartiariaqartut, taamalu aningaasarsiummik ilaat peerneqarpat sunnertiasut, ikiorserniarlugit.
– Nuannerpoq Folketingimi partiiut ataatsimut oqaaseqateqarlutik kalaallit puisinniaernermik inuussutissarsiutillit tapersersormatigit, eqiingasumillu sulissutigalugu inuussutissarsiutitta eqqornerlugaasimaqisup nungusaataanngitsumik ingerlanneqarnera EU-mut paasisitsiniutigalugu, Leif Fontain oqarpoq, taannalu nammineq ulluinnarni aalisartutut piniartutullu inuussutissarsiuteqarpoq.