sælskind
Puisit amii tunisat ikileriarujussuartut
Puisit amii tunineqartut 2015-imiit 2016-imut ikileriarujussuarput. Naatsorsueqqissaartarfiup kisitsisinik takusassiani saqqummiussaani nutaani tamanna atuarneqarsinnaavoq.
2015-imi puisip amii 45.532-t tunineqarput, tamannalu ukiup siulianut sanilliullugu 5.000-nik appariarneruvoq. Kisianni puisit tamarmik naatsorsorneqartartut siorna amerlassusaat 33.679-iinnanngorlutik ikileriarput.
Isertitat ikileriartut
Puisinniartartut aningaasat iluanaarutaannut aamma tunngatillugu annertuumik appariartoqarpoq, puisillu amiinit tunineqartunit isertitat ukiut tallimat ingerlanerani siullermeerluni 10 millionit koruunit ataappaat - tassa 9.888,10 koruunit. Ukiut siuliani 2015-imi puisit amii tunineqartut 15 millionit koruuninik isertitsissutigineqarput.
Aataaq tunineqarnikkut piniartunut isertitaqartitsinerpaasarpoq. Puisi taanna piniartunut katillugu 6,4 millionit koruuninik isertitaqartitsivoq.
Puisip neqaanik tunisineq appariarujussuartoq
Puisip amiinik tunisinermi taamaallaat appariartoqanngilaq. Puisip neqaanik tunisineq aamma taamaappoq, tamanna 33 procentit missaani appariaarteqarpoq, 2015-imi 16,4 tonsinit siorna 11 tonsinut, tamanna Naatsorsueqqissaartarfiup kisitsisaataani takuneqarsinnaavoq.