Puisit amii pitsaanerusumik isigineqalernissaat sulissutigineqartoq

Kalaallit Nunaata avataani puisinniartarneq pillugu nunat amerlasuut akerliupput. Maannakkulli puisit amiisa nunatsinneersut siuarsarneqarnissaannut politikkimi sammiviit akimorlugit suleqatigiinniartoqalerpoq.

2013-imi decembarimi Verdensnaturfondi, WWF, nalunaarummik saqqummiussivoq, tassanilu erserpoq kalaallit puisinniartarnerannik nungusaataanngitsumik ingerlatsisoqarnera pillugu WWF-i tapersersuisuusoq. Pineqarportaaq puisinniartarneq kalaallit piniartortaannut kulturikkut aningaasarsiornikkullu pingaaruteqarluartuusoq. Ajoraluartumik ukiuni kingulliunersuni puisinniartarnermut akerliusut suliniutaasigut kiisalu EU-p puisit amiinik eqqusseqqusiunnaarneratigut kalaallit puisit amiinik tunisassiornerat innarlerneqarsimavoq. Kalaallit puisinniartuunerannut tunngatillugu paasisat nutaat aallaavigalugit maanna politikkikkut sammiviit akimorlugit suleqatigiinniartoqalerpoq, tassani puisinniarnerup Kalaallit Nunaannut kulturikkut aningaarsarsiornikkullu pingaaruteqassusia tunngavigalugu puisit amiinik siuarsaanissaq sulissutiginiarneqalerpoq.

Puisit politikkikkut eqqartorneqartariaqartut
- Puisit politikkikkut oqallisigineqalissapput. EU’p puisinit tunisassianik eqqusseqqusiunnaarnera paasisanik tunngaveqarani misigissutsinik tunngaveqarpoq. Taamaattumik Danmarkimi EU-milu pisamut ilisimasaqassuseq aallaaviusinnaaqqullugu puisit amiinut sammisaqarneq ilisimasaqalersitsinerlu assorujussuaq pingaaruteqqarput. Folketingimi ilaasortat taamak amerlatigalutik suliniut tapersersormassuk assut nuannaarutigaara, Folketingimi ilaasortaq Sara Olsvig Inuit Ataqatigiinneersoq oqarpoq.

Siumup Folketingimut ilaasortaatitaanit Doris Jakobsenimit isumaqatigineqarpoq.

- Kalaallit ukiuni tusindini arlalinni puisinniartarsimapput, piniarnerlu WWF-imiit tapersersorneqarpoq. Puisit amiinit tunisassiat nungusaataanngitsumik tunngaveqarluinnarput, qaavatigullu assorujussuaq kusanarlutik. Puisit amiutigut tulluusimaarutigeqaagut, Doris Jacobsen oqarpoq.

Puisit amii soqutigineqaqqikkiartulersut
Politikkimi sammiviit akimorlugit Kalaallit puisit amiutaannut siuarsaaniaqatigiit suliniutip maluginiarneqarnissaanut dronningip 12. Marts 2014-imi qaaqqusinissaani puisit amiinik atugaqassapput.

- Puisinniarneq puisillu amiinik atortussiorneq kalaallit kulturiannut ilaavoq ukiunilu hornorujulikkaani taamaassimalluni. WWF-ip naqissusermagu tamanna nungusaataanngitsumik pisoq tamatuma Danmarkimi EU-milu nutaamik oqallisigineqarnissaanut piffissanngorpoq. Oqallinneq misigissutsinik takorluukkanillu aallaaveqarani ilisimasanik aallaaveqartoq, taamaattumillu dronningip qaaqqusinerani puisip amiinik atugaqassaanga, Folktingimi ilaasortaq Ellen Trane Nørby Venstre-meersoq oqarpoq.

Flemming Møller Mortensen Socialdemokratineersoq Karina Adsbøl-ilu Dansk Folkepartimeersoq puisip amiinik atugaqarniarput.

Politikerit arfinillit puisit amiinit atisalianik atorniartut saniatigut puisit amiisa nunatsinneersut siuarsarneqarnissaannut politikkit akimorlugit suleqatigiinnermut tapersersuisut aamma tassaapput Folketingimut ilaasortat Finn Sørensen, Enhedslisten, Lisbeth Bech Poulsen, SF aamma Uffe Elbæk, UFG, taakkuali 12. marts dronningip qaaqqusineranut ilaasussaanngillat.