Kopenhagen Fur
Puisit amii Københavnip Rådhusiani
Kopenhagen Furip puisip amianik atisaliat Københavnip Rådhusiani pingasunngornermi takutippai. Københavnimi atisanik nutaalianik sapaatip akunnerani saqqummiineq ammaanersiorneqarneranut atatillugu tusaamasanik immikkullu qaaqqusanik allanik katersuutitsinermi atisat puisip amiinik sanaat saqqummersinneqarput
Københavnimi atisanik nutaalianik sapaatip akunnerani saqqummiineq aallarnerlugu Kopenhagen Furip atisanik takutitsinerata kinguninngua Københavnip Rådhusiani qaaqqusinermi, atisanik nutaalianik pisiumatuut pisiniartartullu allat puisip amiinik atisaliat isiginnaarlugillu attuualaarpaat.
Great Greenlandip siulersuisuini siulittaasoq Bruno Olsen aamma pisortaq Lars Berg saqqummersitat eqqaani nikorfapput, inuillu alapernaattut oqaluuttarlugit.
- Alapernaattut amerlaqaat, amit saqqummersitat attualaarpaat maluginiarlugit, amerlanerillu nuannaajallakkunavittarput, Bruno Olsen taama oqarpoq.
Kopenhagen Fur Great Greeanlandip suleqatiginerata malitsigisaanik puisit amiinik misilittaasinnaanngorsimavoq. Kopenhagen Furillu sulisui puisit amiinik atisaliassanik decemberimilu 2013mi amminik akitsorterussinermut inereersimasussanik novemberiusoq tunineqarsimapput.
- Aatsaat siullerpaamik puisit amiinik suliaqarpugut, sapaatillu akunneri pingasuinnaat piffissarinerat eqqarsaatigalugu inikkagut tanngassimaarnaqaat, taama Kopenhagen Studiomi ittuusoq Thomas Andersen oqarpoq.
Ilusilersuisartup inuusuttup Mia Lisa Sponip Kopenhagen Studio ammerisui suleqatigalugit atisaliat saqqummersinneqartut suliarai.
Great Greenland naammagisimaarinnilluarpoq
Great Greenlandip pisortaa, siulersuisuisalu siulittaasuat saqqummersitsineq naammagisimaarutigaat, suleqatigiinnissarlu qilanaarutigalugu.
- Tassa kialaartumut iserpugut, tamannalu assut nuannaarutigaarput, maani puisit amii takuneqarsinnaapput, tanngasimaarluni Lars Berg oqarpoq.
Siulersuisuni siulittaasup naatsorsuutigaa puisip amiata maanna takoqqusaarutigineqartalernissaa.
- Suleqatertaarpugut nukittuumik, aminik niuertut akornanni nukittoorsuupput, aningaasaateqarluarlutik siunissamullu aningaasaleerusussuseqarluartik. Qilanaraarput suleqatigiinnissarput, Bruno Olsen taama Sermitsiaq.AGmut oqarpoq.