kisermaassineq
Puiaasanik utertitseriaaseq aporaassutigineqalersoq
Puiaasat qanoq ittuunissaannut piumasaqaatit sukannersut, akileraarusersueriaaseq equngasoq aamma Unibrewip Carlsbergillu akornanni qanimut attaveqatigiinneq immiaaqqanik niuerfimmi unammillernermut akimmisaartitsisuupput, Atuisartunut Unammilleqatigiinnermullu Aqutsisoqarfik, poortussanut nalunaarummik nutaamik marsip saqqummiunneqartussatut ilimagineqartumik qilanaarutiginnittoq, nalunaarpoq. Taama pisoqarnerata nalaani Nuuk Imeq tunisassiornerminik 2018-imi taamaatitsiniarluni sioorasaarivoq
Grønlandskonsortiet I/S – teknikkikkut aqutsinermut akisussaasuusoq immiorfinnillu Carlsbergimit Unibrewimillu peqataaffigineqartoq inassuteqarpoq, Nuuk Imermi tunisassiorneq 2018-ip naanerani unitsinneqassasoq.
Tamatumunnga nassuiaatigineqarpoq, suliffeqarfiup siunissami puiaasanik utertitseriaasiusussamut sinaakkutissatut atugassarititaasunik piumasaqaatinillu ukiorpassuarni ujartuisarsimagaluarnera.
Taama Nuuk Imermut siulersuisut siulittaasuat, Justus Hansen, oqarpoq.
Naalakkersuisuni taamatut nalunaarneq tusaatissatut tiguneqarpoq. Avatangiisinut naalakkersuisoq, Suka K. Frederiksen, tusagassiuutitigut nalunaarummi akissuteqarluni allappoq, misissuinerit tunngavigalugit puiaasanik utertitseriaaseq atuuttoq ingerlaannassanersoq, naleqqussarneqassanersoq imaluunniit utertitseriaatsimik nutaarluinnarmik, atuuffiusumik annertusititsiviusinnaasumik atuutsitsisoqalissanersoq Naalakkersuisut isummerfigissavaat. Naalakkersuisoq tamatuma peqatigisaanik oqarpoq, Nuuk Imeq isiginiarneqartussani kisiartaanngitsoq. Pineqartup iluani aallarnisaasut suliami tassani aamma tusarniaavigineqassapput.
Atuaruk: Nuuk Imeq matuneqarnissamut innersuussutigineqartoq
Poortussanut nalunaarummit 2002-meersumit puiaasat Nuuk Imermit atorneqartut Kitaani immikkut salliutinneqartussatut inissisimatinneqarput. Aaqqissuussineq avatangiisit eqqarsaatigalugit ingerlalluarsimavoq, puiaasat 98 procentii utertinneqartarmata.
Niuerfimmi tamanut ammasumi periarfissaqarluartoq
Kalaallit Nunaanni Atuisartunut Unammilleqatigiinnermullu Aqutsisoqarfik nalunaarusiamik 2012-imi saqqummiussivoq, tassanilu oqaatigineqarluni puiaasunut piumasaqaatit sukannersut, akileraarusersueriaaseq equngasoq kiisalu suliaqarfiup iluani peqataasut akornanni qanimut attaveqarneq unammilleqatigiinnermut akornutaasut tunisassiortunullu nutaanut imeruersaatinik Kalaallit Nunaanni siammarterinissamut ajornakusoornerulersitsisut.
Atuaruk: Matusinissamik oqariartuuteqarneq Naalakkersuisut tusaatissatut tiguaat
Aqutsisoqarfik tamatuma kingorna Naalakkersuisunut saaffiginnippoq, poortuutissanut malittarisassat niuerfimmi unammilleqatigiinnermut ajoqutaasumik sunniuteqarnerat erseqqissaatiginiarlugu.
- Pilersinneqarsimavugut isumalluutinik atuinerup inuiaqatigiinni sapinngisamik sukumiinerpaanissaannik qulakkeerinnittussanngorluta. Isumarput imaappoq, puiaasat killilerujussuit atuuttussaatitaanerat allanngortinneqarpat tunisassiat allat, inuussutissarsiornikkut periarfissat nutaat akillu appasinnerusut pissarsiarineqarsinnaasut. Niuerfimmi tassani ammaassisoqarpat periarfissaqarpoq annertungaatsiartorsuarnik, Atuisartunut Unammilleqatigiinnermullu Aqutsisoqarfiup pisortaa, Nicolai Odgaard Jensen, oqarpoq.
Suliaq pillugu Sermitsiami atuaruk: