PSG-iip Barcelona pingajussaaneertinnaveersaassuaat

Taamaasereernikuupput. Paris Saint-Germainip ataasiaannavillutik Champions Leaguekimiit FC Barcelona peersinnikuuvaat kisianni tamanna ukiut 22-it matuma siorna pivoq

Frankrigimi pissartaasut maanna periarfissaqarput Barcelona ottendedelsfinalimiik peersissallugu, marloriarlutik naapittussaapput unamminerli siulleq ualimut tallimanut tanneq qulingiluat aallartissaaq.

Champions Leaguekimi ukiut sisamat iluanni pingajussaannik unamminerit knockoutimik taasagaannik naapilerput. Paris Saint-Germaini 2013-imi 2015-imilu kvartfinalimi ajorsartarsimapput.

- Barcelona massakkut nunarsuarmi pitsaanerpaagallarput, ajugaasuaannartoqanngilarli, PSG-iip arsaattartua Lucas Moura tusagassiuuteqarfimmut AFP-mut taama oqarpoq.

Luacas Moura spaaniamiunik marloariarlutik peersitaanermi ilaavoq, kingullermik ukiut marluk matuma siorna unamminerit katinneranni 1-5-mik ajorsarlutik.

Upernaakkulli 2014-imi Paris Saint-Germainip arsaattarfimminni 3-2-mik FC Barcelona gruppikkaarnerit ingerlanneqarneranni ajorsartinnikuuvaat.

Lucas Mourallu Barcelonap saassussisartuinut pingasunut Lionel Messimut, Neymarimut Luis Suarezimulli tunniutiinnarusunngilaq.

- Uangut aamma pikkorippugut. Ukiut kingulliit sisamat tallimat Champions Leaguekimi angusagut pillugit ataqqineqalernikuuvugut, brasiiliamiu saassusisartoq taama oqarpoq.

Paris Saint-Germainsillu Edinson Cavani isumalluutigisorujussuuvaat.

Aasaq Zlatan Ibrahimovicip Manchester Unitedimut nuummat saassussisartup Uruguayimiup holdimi isaatitsisartutut paarlallualaavippaa.

Svenskillu nuunnerata kingorna PSG franskit ligaanni ukiut sisamat siuttuujuaannaraluarlutik siuttuujunnaarsimapput.

Edinson Cavani ullumi 30-liisoq, franskit ligaanni målertaqarnerpaajungallarpoq 25-nik isertitaqarluni, Champions Leaguekimili arfinilinnik maannamut isertitaqarnikuulluni.

PSG-iip unamminerani kingullerni arfinilinni qulingiluanik isertitsinikuuvoq.

- Inuuissiorninni ajugaassagutta nuannissaqaaq, Edinson Cavani taama oqarpoq.

Spaaniamiut ligaanni FC Barcelonap Real Madridi inorsaatigivaat, taamaammat Lionel Messip ilaasalu Champions Leaguekimi angusarissaartariaqarput.

Ukiarmi FC Barcelona Europami unammilluaqattaarput, gruppikkaarluni unamminerni Messi quleraarluni.

- Barcelona unammillugu kukkunaveersaartariaqarpoq. Kukkungaluaruimmi pillarneqassaatit, Lucas Moura taama oqarpoq.

Aasaq Paris Saint-Germainip Unai Emery sungiusaasortaarivaat. Spaaniamiup PSG-mut nuunnginnermi Sevillakkut Europa Leaguemi pingasunik tulleriinnik pissartanngortippai.

Barcelonamut ilisimasai iluaqutigisinnaavagut, PSG-iip anføreria Thiago Silva isumaqarpoq.

- Sanngiiffiisa ilaat oqaluttuarisinnaavai. Eqqarsartaasiata arsaannermullu nalunngisaqassusaa Barcelonamut unamminissatsinnut iluaqutigisinnaavagut.

- Holdit Barcelonakkutut ittut unammisagaanni unamminermi suna tamarmi iluatsittariaqarpoq, Thiago Silva PSG-iip nittartagaanut taama oqarpoq.

Marlunngornermi ottendedelsfinalernermi allat unammisussat ukuupput portugaalermiut Benfica tyskillu Borussia Dortmundi.

Arfininngormat Dortmundip Bundesligami allerni inissisimasut Darmstadti unammigamikku 1-2-mik ajorsarfigaat, siuttuusullu Bayern Müncheni 15 pointinik inorsaatigilerlugit.

/ritzau/