Wednesday, November 1, 2017 - 09:57

Professorimut eqqartuussassanngortitsineq unitsinneqarpoq

Assi.: Hans Jukku Noahsen
Professor Ole Helby Petersenip eqqartuussassanngortinneqarnera unitsinniarlugu Kommuneqarfik Sermersooq aalajangerpoq.

Kommunaldirektør Lars Møller-Sørensenip professor Ole Helby Petersenip eqqartuussassanngortinnissaanut aalajangiisuuvoq, taassuma aviisimut Sermitsiamut aggustip 18-anni kommunip assut nangaanartoqartitaanik piviusuunngitsunik oqaaseqarsorinninnera pissutaalluni.

Oqallinneq
- Ullormi kingullermi eqqartuussivimmut sassartitsinissaq pillugu oqallinerup kingorna unitsinniarlugu aalajangerpunga, Lars Møller-Sørensen Sermitsiaq.AG-mut oqarpoq.

- Suliaq piffissami nukinnillu atuiffiussaaq, kommunip tamanna ineriartortitsinermut atoruniuk pitsaanerpaassaaq. Pisortaqarfiup eqqartuussassanngortitsinermik suliaqarnermit illoqarfiup immikkoortuanik pilersitsinissaq pingaarneruvoq, kommunaldirektøri oqarpoq, taassuma taama ittumik eqqartuussititsinissamik suliaqarneq tunngavissaqanngitsoq qularutiginngilaa.

- Atorfilittat naalakkersuinermik sulialinnut salloqittaaneraneqartillugit, soorunalimi qisuariarnissamut pisussaaffeqartoqartarpoq, Lars Møller-Sørensen oqarpoq, taanna professorip Sermitsiamut aggustip 18-anni oqaatigisaanut kamaammeqqasutut misigisimavoq. 

Borgmesteri naammagisimaarinnittoq
Naalakkersuinikkut aaqqissuussaaneq aamma borgmesteri, professorip eqqartuussassanngortinnissaanut aalajangiinermut peqataanngitsut Lars Møller-Sørensen Sermitsiaq.AG-mut ilisimatitsinikuuvoq.

Borgmester Asii Chemnitz Narup ilisimatitsivoq:

- Suliap naammassineqarnera naammagisimaarpara. Tamatuma saniatigut oqaasissaqanngilanga, borgmesteri oqarpoq.

Kommunip professori eqqartuussassanngortinniaraa Sermitsiaq.AG-p marlunngormat saqqummiummagu oqallisaangaatsiarpoq.

Suliaq immikkuullarissoq
Ilisimasallit arlallit eqqartuussassanngortitsineq ''immikkuullarilluinnartutut'' oqaatigaat, taamatullu iliortoqarnikuunnginnerarlugu. Medie- og Journalisthøjskolenimi Aarhusimi inuiaqatigiilerinermi ilisimatusarnermut pisortaq Roger Buch, eqqartuussassanngortitsineq arlalitsigut nangaanartoqartinnerarpaa.

Nunatsinni naalagaaffiup sinniisorisimasaa, Steen Spore, assigalugu suliaq nangaanartoqartoq, Roger Buch isumaqarpoq, tamannalu suliamik taama ittumik aallartitsinissaq kommunip piginnaatitaaffiginngikkaa.

Roger Buchip aammattaaq eqqartuussassanngortitsinermi tamat oqartussaanerannut ajornartorsiummik peqartoq oqaatigaa.

Demokratii nutaaliaasoq
- Demokrati aamma aqutsineq nutaajusoq paasiuminaatsorujussuuvoq, kommunit aamma pisortani oqartussaqarfiit ilisimatoortarpassuatik aningaasaaterpassuatillu pissutigalugit pissaaneqartorujussuupput, ingammillu tamakku borgmesterinut pissaanilinnullu allanut iluaqutaasarput. Ilisimatuut isornartorsiuisutut atuussinnaapput, aamma kommunit oqartussaqarfiillu eqqortuliornerarlutik eqqartuussivilersuleraangata, taava demokratii suli equnganerulersinneqartarpoq, Roger Buch Sermitsiaq.AG-mut oqarpoq. 

Seneste nyheder / Nutaarsiassat kingulliit