Autisme
Prinsesse Nuummut tikeraalersoq
Prinsesse Marie autisme pillugu ataatsimeersuarnermut peqataajartorluni marlunngorpat Nuummukassaaq.
Prinsesse Mariep Nuummiinnermini peqataaffissai amerlapput. Tikeraarnermi pissutaa autisme pillugu ataatsimeersuartitsinerup Landsforeningen Autisme Nunatsinni immikkoortortaata pilersinneqarnerata saniatigut allanik pisassaaloqarpoq. Peqatigiiffimmut Prinsesse illersuisuunini pissutigalugu Nunatsinni immikkoortortaqarfeqarlernissaa peqataaffigissavaa.
Prinsesse marlunngorpat mittarfimmi naalakkersuisup Sara Olsvigip, Landsforeningen Autismep siulittaasua Heidi Thamestrup, Nunatsinni Rigsombudsmandip Mikaela Engell Kalaallit Nunaannilu immikkoortortaqafiup siulittaasuata Karsten Høyip tikilluaqqusisorissavai.
Autismeqartoq sulisoq
Prinsesse Marie tikeqqammitsiarluni Snader Høy mittarfimmi sulisoq alakkassavaa. Taanna autismeqaraluarluni sulivoq.
Ulluni tulliuttuni Prinsessep ulloq unnuarlu paaqqinnittarfik Uulineq, inuusuttut autismeqartut najugaqarfiat Suluppaluk, inersimasunut immikkoortortaqarfik Qiimaneq, Nunatta katersugaasivia, Naalakkersuisuni ilaasartat Sara Olsvig, Agathe Fontain Doris Jakobsenilu nereqatigalugit, OCN-imi pikkorissarsimanermut uppernarsaatinik allagartartaartitsineq borgmester Asii Chemnitz Narupilu nereqatiginissaa ilaatigut angumerineqassallutik.
Autisme pillugu ataatsimeersuarneq
Landforeninge Autisme sisamanngorpat receptioneqartitsissaaq. Nunatsinnilu immikkoortortaqarfiup prinsesse Mariallu autisme pillugu ataatsimeersuarneq sisamanngorpat aammassavaat. Tamanna pereerpat prinsesse tallimanngorpat Københavnimut ingerlaqqissaaq.