Prins Nikolai inersimasut akornanniilerpoq
Dronningip ernutaa angajulleq 1982-imiilli kunngikkormiuni siullersaalluni Fredensborg Slotskirkemi apersortippoq
Kunngikkormiut ilaminnik ukiut 30-t ingerlaneranni aatsaavissuaq arfininngornermi inersimasut akornannut tikilluaqqusipput.
Prins Nikolai Fredensborg Slotskirkemi inersimasut akornannut ilanngunnissamut tullinnguuppoq.
Kunngikkormiuni kingullermik ukiorpassuit matuma siorna apersortittoqaraluartoq Nikolaip 13-inik ukiullip apersortinnera immikkuullarissuunngitsoq, kunngikkormiuni tusagassiortuusimasoq Bodil Cath oqaluttuarpoq.
- Prins Nikolaip prins Joachimik imaluunniit prins Frederiup apersortinnerannit allaanerussuteqanngilaq, Bodil Cath, BT-mut kunngikkormiunik tusagassiortutut ukiorpanni kunngikkormiunik malittarinnissimasoq, oqaluttuarpoq.
Apersortittut allat assiginagit prins Nikolai kunngikkormiuni apersortittoqarnerani ileqquusartutut oqaluffimmi kisimiilluni saarlerpaani issiassaaq. Prinsip ilaqutai oqaluffiup issiaviini katersuussimassapput.
Oqaluffimmeereernerup kingorna ilaqutaasut tamarmik Fredensborg Slotimi Kuppelsalenimi ullup-qeqqasioqatigiinnissamut dronninngikkunnit qaaqquneqarput.
Dronning Margrethellu nalliuttorsiutiginninnermik ingerlatsisuunera prins Nikolaip ilaqutaani pissutsinut pitsaasunut takussutissaalluartoq, Bodil Cath isumaqarpoq.
- Aanaap nalliuttorsiortitsisuunera ajunngilluinnarpoq. Tamanna ilaqutariilluarnerannut takussutissaavoq, naak Joachim Alexandralu avissimagaluartut, oqarpoq.
- Ukiorpassuimmi ingerlareersimapput, maannalu assigiinngitsunut ikinngutigiittut pissuseqalersimallutik, Bodil Cath oqarpoq.
Biskop Norman Svendsen, kunngikkormiut palaserisartagaat, apersortitsisuussaaq. Dronningi Slotskirkenimi 1955-imi aamma apersortissimavoq, soorluttaaq prins Nikolaip ataataa akkaalu 1982-imi 1981-imilu tassani aamma apersortissimasut.