Pitsaasumik tusagassioriaaseqarneq

A. Nalunaarutit eqqortut

  1. Tusagassiorfiit suliassaraat eqqortunik sukkasuumillu paasissutissiisarnissaq. periarfissaqartillugu qulakkeerneqartariaqarpoq paasissutissat tunniunneqartut ingerlateqqinneqartulluunniit eqqortuunerat.

  2. Nutaarsiassanik pissarsiffiit isorinninnermik takutitsivigisariaqarput pingaartumik taakku oqaatigisaat inuttut soqutigisanik akoorneqarsinnaasimagaangata imaluunniit ajoqusiiniarnermik siunertaqaraangata.

  3. Paasissutissat arlaannut ajoqusiisinnaasut, nikanarsaataasinnaasut tatigisaanermilluunniit annikillisitsisinnaasut saqqummiutilersinnagit immikkut ittumik misilinneqartassapput, pingaartumik pineqartumut saqqummiunneqarnerisigut. Saqqummiussineq imatut pisariaqarpoq apersorneqartoq akinissaminut naammaginartumik piffissalerlugu.

  4. Saassussinerit akissutillu pissusissamisuussappat ataqatigiissillugit assigiimmillu periaaseqarluni saqqummiunneqartariaqarput. Tamanna pingaartumik nikanarsaataasunik ajoqutaasinnaasunilluunniit oqaatigineqartunut tunngavoq.

  5. Paatsuugassaajunnaarsinneqassaaq suut paasissutissaviunersut aamma suut oqaaseqarfiginninnerunersut.

  6. Qulequttat akunniliussallu ilutsimikkut imarisamikkullu allaaserisamut aallakaatitamulluunniit pineqartumut tunngasuussapput. Taamaapportaaq tusagassiorfiit nutaarsiassaatiminnik nittarsaassinerannut tunngatillugu.
     
  7. Nalunaarutinik eqqunngitsunik naqqiisoqartassaaq aaqqissuisoqarfiup nammineq sulissutiginninneratigut, nalunaarutigineqartuni pingaarutilinnik kukkusoqarsimappat taakkuluunniit paasineqarniariarpata. Imatut ilusilerlugu naqqiisoqartassaaq atuartartut, tusarnaartartut isiginnaartartulluunniit naqqiissummik maluginninnissaannut erseqqissumik periarfissillugit.

B. Pitsaasumik tusagassioriaaseqarnermut akerliusumik pissusilersorneq

  1. Nalunaarutit, inuttut inuunerup eqqissisimanarneranut ajoqusiisinnaasut pinngitsoorniarneqassapput, erseqqissumik tamat soqutigisaasa tamanut ammasumik oqaatiginninnissaq pisariaqalersinngippagu. Inuit ataasiakkaat inuttut tatigisaanermik illersorneqarnissaa pisariaqartippaat.

  2. Imminut toqunneq imaluunniit imminut toqoriaraluarneq oqaluttuarineqassanngillat erseqqissumik tamat soqutigisaasa tamanut ammasumik oqaluttuarineqarnissaat pisariaqartinngippassuk tunngavissinngippassulluunniit.

  3. Pinerluttuliorfigineqartut ajoqusertulluunniit sapinngisamik annertunerpaamik qajassuunneqartassapput. Taamaapportaaq ilisimannittutut uppernarsaasunut eqqugaasunullu ilaqutaasunut tunngatillugu. Assilisanik katersinermi ingerlatitseqqinnermilu, taamatuttaaq inuit nammineq assilisaannik, qajassuussisoqartassaaq ajuallatsitsinaveersaartoqartassallunilu.

  4. Ussassaarutit aaqqissuisullu allaaserisaasa akornanni erseqqissumik avissaaruteqartitsiuartoqassaaq. Oqaasertaliussat, nipitaliussat assiliartaliussallu toqqaannartumik toqqaannanngitsumillu niuernermik soqutigisanik pissuteqartut taamaallaat ilanngunneqartassapput, tusagassiornermut tunngatillugu erseqqissumik malitassat tamanut saqqummiunneqarnissaat pisariaqartippassuk.

  5. Meeqqat inuillu allat oqaatigisamik allatulluunniit peqataanermik sunniutissaannik paasinnissinnaasutut naatsorsuutigineqarsinnaanngitsut immikkut sianiginiarneqartassapput. Apersuilluni oqaloqateqarnernik assigisaannilluunniit tamanut saqqummiussilernerni angajoqqaat akuersissutaat pissarsiarineqaqqaartariaqarpoq, eqqartorneqartup qanoq issusiata ukiukinnerusullu ukiuisa tamanna pisariaqartippassuk.

  6. Paasissutissanik katersinermi tamanulluunniit saqqummiussinermi allat tatiginninnerat, misigissusii, ilisimasaqannginnerat, misilittakkanik amigaateqarnerat imaluunniit aqutsisinnaassuseqannginnerat iluaqutigineqassanngillat.

  7. Isertortumik assilisanik taamaallaat tamanut saqqummiussisoqartariaqarpoq peqataasut akuersisimappata, imaluunniit inuiaqatigiinnut tunngatillugu soqutigisat ataasiakkaat illersorneqartussaanerat erseqqissumik qaangersimappassuk, tusagassiortutullu uppernarsaatissat pisariaqartinneqartut allatut iliorluni pissarsiarineqarsinnaanngippata pissarsiariuminaatsorujussuullutilluunniit.

  8. Nalunaarutit digital atorlugu tusagassiuutitigut tamanut saqqummiunneqartut saqqummersinneqarnermik kingunerujussuatigut pissarsiarineqarsinnaakkajuttassapput. Tusagassiorfimmut kissaateqarnikkut taamatut paasissutissat mianernartut inummulluunniit tunngasut siusinnerusukkut tamanut saqqummiunneqarsimasut pissarsiarineqarsinnaanerat akornuserneqarsinnaavoq, periarfissaqassappat taamaattussatullu isigineqarpat.

C. Eqqartuussivinnit ilanngutassiat

  1. Nalinginnaasumik tusagassiornermi ileqqussanut tunngatillugu malittarisassat A-mi B-milu allassimasut eqqartuussivinnit ilanngutassiornermuttaaq atuupput.

  2. Eqqartuussivinnit ilanngutassiornermut malittarisassat sulianik piareersaanermuttaaq atuupput, taamatuttaaq suliat pillaatissiissutissat politiinit unnerluussisarnermullu oqartussaasunit suliarineqarnerannut.

  3. Eqqartuussivinnit ilanngutassiat piviusorsiortuusariaqarput. Suliat piareersarneqarnerini killiffinni tamani eqqartuussivimmilu suliarineqarnerini tusagassiortup illuatungeriit - pillaatissiiniarluni suliani unnerluussisarnermut oqartussaasut illersuisullu - isumaat pitsaasumik naligiimmillu oqaatigeqqinniartariaqartassavai.

  4. Pillaatissiiniarluni suliamik oqaluttuarinninneq suliap naammassineqarneranit imaqarniliamik malitseqartinneqartariaqarpoq taanna unnerluussiunnaanerugaluarpat, pinngitsuutitsinerugaluarpat pineqaatissiissutaagaluarpalluunniit apeqqutaatinnagu.

     

  5. Ilaqutariinnermi pissutsit, inuttut ilisarnaatit, sumit naggueqarneq, nunamit suminngaanneersuuneq, upperisarsiorneq, kinguaassiuutitigut qanoq ittuuneq kattuffinnulluunniit tunngasut taamaallaat taaneqartariaqarput suliamut tunngatillugu pisariaqaraangata.

  6. Pillaatissiiniarluni suliaq aalajangiivigivinneqanngikkallartillugu unitsiinnarneqanngikkallartilluguluunniit nalunaarutinik suliap paasineqarnissaanut akornusiisinnaasunik imaluunniit pasineqartoq unnerluutigineqartorluunniit pisuusoq oqaasertaqartunik tamanut saqqummiussisoqartassanngilaq. Pillaatissiiniarluni suliamik eqqartuinermi erseqqissumik takuneqarsinnaassaaq pasineqartoq/unnerluutigineqartoq pisuulluni pisuunaniluunniit nalunaaruteqarsimasoq.

  7. Sammivik erseqqissoq piviusorsiortorlu sapinngisamik annertunerpaamik malinneqassaaq suliat suut oqaluttuarineqarnissaannik aalajangiinermi aamma pisuni suni pineqartut aqqisa taaneqartarnissaanni. Pasineqartup unnerluutigisalluunniit aqqa allatulluunniit kinaassusersineqarsinnaanera ilanngunneqassanngilaq atiata tamanut saqqummiunneqarnissaa tamanut soqutiginaateqanngippat.

  8. Inuup atiatigut taallugu politiinut nalunaarutigineqarsimaneranik nalunaaruteqarnermi qajassuussisoqartassaaq. Tamakkuninnga nalunaarutissat saqqummiunneqartassanngillat nalunaarutiginninneq politiinit imaluunniit unnerluussisarnermut oqartussaniit akuliuttoqarneranik kinguneqarsimatinnagu. Tamannali nalunaarutigineqartunut nalunaarutigineqartup nammineerluni saqqummiussaanut atuutinngilaq, imaluunniit nalunaarutigineqartoq allani ilisimaneqareersimappat imaluunniit pingaaruteqarluni tamanut soqutiginaateqarpat imaluunniit pissutsit malillugit isumaqarnassappat nalunaarutiginninneq patajaatsumik tunngavilersugaasoq.

  9. Inuk pasineqartoq, unnerluutigineqaqataasoq pineqaatissinneqartorluunniit pineqartup siusinnerusukkut pillagaalluni pineqaatissinneqarsimanerata saqqummiunnissaanut qajassuunneqartariaqarpoq, pissutsinut pineqartup maannakkut pasineqassutaanut, unnerluutigineqassutaanut pineqaatissinneqassutaanulluunniit taamaaliorneq isumaqanngippat. Nutaarsiassanut allanut atatillugu inummut siusinnerusukkut pilaaniarluni suliaasimasut pisariaqanngippat taakkartorneqartariaqanngillat.

Tusagassiivik Sermitsiaq.AG-imit eqqunngitsumik pineqarsoriguit, suliatsinnut kanngunarsagaasutut pineqartutut misigiguit attaveqarfigisinnaavatsigut, imaluunniit uunga maalaaruteqarsinnaavutit:

Tusagassiinermut tunngasuni aalajangiisartut / Pressenævnet 
c/o Grønlands Landsret 
Jens Kreutzmannip aqqutaa 5, 2.sal 
Postboks 1040 
3900 Nuuk

Oqarasuaat: 36 39 00 
post.landsret@domstol.gl

Tusagassiinermut tunngasuni aalajangiisartut qanoq attaveqarfigineqarsinnaanersut uani takukkit