sanaartorneq
Praktikkerfissat maanna amerleqqittariaqarput
Sanaartornermik suliaqartut maanna annertuumik siuariaateqartut amerlanerusunik praktikkertoqalertariaqartut, Naalakkersuisut aamma Sulisitsisut isumaqarput
Kalaallit Nunaanni inuussutissarsiutit immikkoortuanni sanaartornermi maannakkut annertuumik siuariartoqarpoq. Ajoraluartumik ilinniartut sungiusarfissaat taamatut amerlerianngillat, Naalakkersuisut aamma Sulisitsisut ataatsimut tusagassiuutinut nalunaarumminni taama aallapput.
- Kalaallit Nunaanni sanaartukkat nutaat amerliartorput, soorlu isertitsivik nutaaq Nuummilu umiarsualiviup allilernera, Aasianni ilinniarnertuunngorniarfiup allanngortiternera Ilulissanilu Atuarfik Mathias Storch nutaaq. Tassunga peqatigitillugu inuussutissarsiutit immikkoortuanni tassanerpiaq suliffeqarfimmik ilinniarfissamik qinnuteqaateqartut piukkunnartut 100-nit amerlanerupput.
Affaat sinnerlugit ikileriartut
Namminersorlutik Oqartussat naapertorlugit, qinnuteqartut praktikkerfissamik neqeroorfigineqartut 2009-mit 69-init 26-nut ikileriarnerat 2013-imi 2014-imilu sanaartortoqarpallaannginneranik pissuteqarpoq. Taamaalilluni sungiusarfissat affaat sinnerlugit ikileriarnikuupput.
Sanaartornerilli nutaarpassuit ilinniarnermi sungiusarfissat amerleriaqqinnerannik kinguneqartariaqaraluarput.
- Sanaartornerilli maannakkut amerleriaqqimmata pisortat namminersortullu suliffeqarfiisa ilinniartoqaqqilernissaat piffissanngorpoq, Henrik Leth oqarpoq, tassungalu peqatigitillugu erseqqissarlugu pisortat sanaartornissamik pilersaarusiornerisa allanngorannginnissaa pingaaruteqartoq, suliffeqarfiit taamaalillutik sanaartukkat amerlassusaasa allanngorarpallaannginnissaannut piareersimaniassammata.
Qinnuteqartunut nikallornartoq
- Piginnaasalinnik taamatut qinnuteqartoqarnera iluarusunnartorujussuuvoq, tassungali peqatigitillugu taakku sungiusarfissaqannginnerat pissutigalugu maangaannartinneqartarnerat nikallornarpoq. Inuusuttut ilinniarnissaat tamatta soqutigisaraarput, taamaalillutik inuiaqatigiit ineriartornerannut peqataaniassammata, ilinniarnermut naalakkersuisoq Nivi Olsen oqarpoq.
- Amerlanerpaanik ilinniartoqalernissatsinnut tunngatillugu malittarisassat ullumikkut eqqortumik kajumilersitsisarnersut misissortariaqarparput, ineqarnermut naalakkersuisoq Knud Kristiansen ilassuteqarpoq.
Tamassuma saniatigut ilinniartut inissaqartinneqarnissaat Namminersorlutik Oqartussat isumagissavaat, aamma illoqarfinni Nuuk Sisimiullu assigalugit immikkut ilinniartunut inissaqarfiunngitsuni sanaartornernut atatillugu.
Atuaruk: Sulisitsisut kattuffiata Sisimiuni sanaartorneq aallarteqqinnissaa piumasaraa