Demokraatini saqitsaanneq
Poul Hansen Demokraatinit ilaasortaajunnaartoq
Inatsisartuni Sermersuumilu kommunalbestyrelsimut ilaasortaasimasoq marlunnik qinigaaffeqarneq akerleralugu partiimiit ilaasortaajunnaarpoq.
Nutartingaq 9:50
Demokraatit aaqqiagiinngissuteqarnerat sakkortunerulerpoq.
Politikereq sullarissoq Poul Hansen Demokraatinit tunuarpoq.
Partiip siuttuisa marlunnik qinigaaffeqarnermut isumaat pillugu taama pisoqarpoq.
- Misilittagaqarfingaara, oqarsiinnaavungali ajortoq, Poul Hansen Sermitsiaq.AG-mut oqarpoq.
Nalunaaruteqarneq pivoq, partiip siulittaasuisa sullarissasoq alla, Michael Rosing, Inatsisartuni ataatsimiititalianut ilaasortaaffianik oqaaseqartarfianillu akisussaaffiiarmassuk.
Michael Rongip aamma iluarisimanngilaa, Randi Vestergaard Evaldsen, Nivi Olsen kiisalu Justus Hansenip Inatsisartuni Kommuneqarfik Sermersuumilu kommunalbestyrelsiani marlunnik qinigaaffeqarniarlutik aalajangersimanerat.
- Siornatigut partii Demokraatit, marlunnik qinigaaffeqartarneq pillugu nipituuliornerpaajusarsimapput, maannalu killormorluinnaq pisoqarpoq, Poul Hansen oqapoq.
Taassuma oqaluttuaraa, nalunaaruteqarnini sivisuumik eqqarsaatigisimallugu.
Poul Hansen Sermersuumi qinigaaffiup siuliani kommunalbestyrelsimut ilaasortaasimavoq. Anda Uldumilu 2015-ip ukiaanerani Naalakkersuisunit tunuarmat, Randi Vestergaard Evaldsen Naalakkersuisunngorpoq, Poul Hansenilu tassunga sinniisuungami Inatsisartunut ilaasortanngortinneqarluni.
- Naammagittartorujussuungaluarpunga, misilittakkallu aallaavigalugit marlunnik qinigaaffeqartoqarsinnaanngilaq, Poul Hansen oqarpoq.
Taassuma aamma tulluarsorinngilaa, taakkua Sermersuumi kommunalbestyrelsimut Inatsisartunilu ilaasortaanerat.
Poul Hansen misigisimavoq, partiip siulersuisuinut isummernini pillugu tusaaneqarnaviarani.
Taannali politikkimit tunuarnissaminik eqqarsaateqanngilaq.
- Politikeritut ingerlaannassanngaa, kisianni partii sorleq ilaasortanngorfigissanerlugu suli aalajaginngilanga.
Immikkulli pingaatitani sulissutigiinnarusuppaa, tassaasoq ilaqutariit ajornartorsiutillit.