nittartagaq
Pornop akiniutigineqarnera: Sakkortunerusumik pillaasoqartalerniartoq
Inuit allat atisaqaratik assiinik internetimut ikkussisartut sakkortunerusumik pillarneqartarnissaannik Danmarkimi suliniuteqarneq inatsisinik atuutsitsinermut naalakkersuinikkut akisussaasup Sara Olsvigip soqutiginnilluni malinnaavigaa
- Tamatumani aamma iliuuseqartariaqavippugut.
Ersarissumik oqariartuuteqarneq
Isumaginninnermut, ilaqutariinnermut, nalingiissitaanermut inatsisinillu atuutsitsinermut Naalakkersuisoq Sara Olsvig taama ersaritsigisumik akissuteqarpoq internetimi pornop akiniutigineqarneranik nunarsuarmi ajornartorsiuteqarnerujartorneq pillugu.
Aviisi AG saqqummertoq kingulleq taama allaaserisaqarpoq.
Danmarkimi inatsisinik atuutsitsinermut ministeri Søren Pape Poulsen naligiissitaanermut ministeri Karen Ellemann ilinniartitaanermullu ministeri Merete Riisager peqatigalugit pornop akiniutigineqartarneranut inatsisiliorpoq ilaatigut mattaangasut assinginik siammarterineq qaammatini arfinilinniit ukiunut marlunnut pillaatigineqarsinnaalerluni. Inatsisissamik taassuminnga suliaqarneq Sara Olsvigip qanimut malinnaavigaa. Siumungaarli oqarusunngilaq sukannernerusumik pillaasarnissaq aqqutissaanersoq.
Arlalitsigut periusissiortariaqartoq
- Isumaqarluinnarpunga suliassaqarfimmi arlalitsigut periusissiortariaqartugut. Maannakkorpiarli Danmarkimi qanoq iliornersut paasisaqarfiginerunissaa siunertaraarput nunatsinni qanoq iliornissarput aalajangertinnagu, Sara Olsvig oqarpoq.
Doris J. Jensen ilinniartitaanermut Naalakkersuisuusoq aamma arlalitsigut iliuuseqarniarpoq. Inatsisartut ukiaanerani ataatsimiinneranni MMS aamma/imaluunniit inuit attaveqaqatigiittarfii aqqutigalugit mattaangasut assinginik siammarterinermi aarlerinartut meeqqat atuarfiani atuartunut angajullernut ilinniartitsinerup ilaanissaanik siunnersuut pingajussaaneerneqarluni oqaluuserineqassaaq. Siunnersuut Inatsisartunit tamanit annertuumik tapersersorneqarpoq, aallaqqaammulli taamaalluni.
Atuarfimmi skemanut ilanngunnissaa pingaaraluartoq naammanngilaq, Sara Olsvig isumaqarpoq.
Allaaserisaq tamaat aviisimi AG-mi atuaruk, taanna uani digitaliusumik takusinnaavat: