Oqaatsit

Pop-rock atorlugu kalaallit oqaasii ilinniakkit

Nipilersukkat erinarsukkallu, oqaatsinik ilinniartitsisumit Drude Aviaja-mit aamma Aviaja Lumholtimit taalliarineqarlutillu erinniarineqarsimasut atorlugit oqaatsit ilinniarneqalersinnaapput. Cd nutaaq ´Groovy Grammatik´ saqqummersingajalerpoq

Kalaallisut oqaluutit naggaterpassui erinarsorluni maanna ilinniarneqarsinnaalerput. Tamanna pisinnaavoq cd ´Groovy Grammatik´ assigiinngitsorujussuarnik qulingiluanik erinarsuutitalik atorlugu.

– Sisimiuni niviarsiaraallunga arlaanni naveerserujussuaqaanga kalaallisut oqalussinnaannginnama. Tamanna kingunerlutsissimavara. Taamaattumik oqaatsit saperakkit kanngusullungalu imminut pisuutittarsimavunga. Maanna CD-liorpugut, inuunermik nuannarinnilluartumik isumassarsiorfissaalluartumillu, allat oqaluutit nagguippassuinik uattulli ilinniarusuttut iluaqutigisinnaasaat, Drude Aviaja oqaluttuarpoq.

Taanna atortunik ineriartortitsisartuuvoq Sisimiunilu oqaatsinik ilinniarfimmi kalaallisut pilerlaanik atuartitsisarluni taalliallu allassimallugit. Erinniortuusimavoq erinniortoq aamma performer Aviaja Lumholt, Københavnimi najugalik. Aviaja Lumholt ilaqutariinnit nipilersortartunit Lumholtikkunneersuuvoq, amerlasuullu rockertartunit ZIKAZA-kunnit eqqaamassavaat.

NIpilersukkat assigiinngitsorujussuupput, reagge aamma blues pop-ilu, rap samba-lu. Isumaqaraanni oqaasilerineq nuanniitsuusoq nipilersukkat tusaaniagassaapput. Qallunaatut kalaallisullu taallaat suliarineqarsimapput Drude Aviaja-mit, atuagartaanilu oqaaseqatigiilerineq paasiuminartumik nassuiarneqarsimavoq.

CD saqqummersitsisumit Oqaatsinik Pikkorissarfimmit ilassinninnikkut ilisaritinneqassaaq. Tamanna pissaaq maajip 24-anni nal. 13.00. CD-mit erinarsukkat ilaat aliikkusersuutigineqassapput.

Powered by Labrador CMS